熱門:

2021年11月17日 即巿股評 港股直擊

【盤房來料】ASM太平洋猛追落後 股價或能突破50日線

美股隔晚保持升勢,美滙指數升穿96,人民幣轉弱,港股連升六日後回吐,不過20天線(25404點)守得幾穩,大市喺25500水平窄幅上落,波幅不足200點。恒指低開45點,報25667,已經係半日高位,開市無耐曾跌近200點,跌193點見25520半日低位,隨後跌幅曾收窄至百點內。半日最終跌118點,報收25595點;國指中午報收9174點,跌51點;科指跌43點,報收6669點。半日成交只有620.5億元,仍然係一場悶局。

藍籌大致受壓,雖然息率趨升,但金融股唔威得幾耐,今日又碌返落嚟,半日友邦(01299)跌1.1%;建行(00939)下滑0.9%;平保(02318)走低0.4%。至於噚日彈一彈嘅海底撈(06862),果然繼續低位徘徊,今日又復跌2.6%。而舜宇(02382)半日跌3.3%,係表現最差恒指成份股。而創科(00669)季度銷售超出預期,半日升3.2%,今日好得大戶歡心,藍籌之中今日暫時佢升最多。ATMX都係咁上下,騰訊(00700)跟小米(01810)向好,但美團(03690)跟阿里(09988)則下跌。呢啲重磅股一日唔爭氣少少,大市要向上突破26000有難度。

大摩又嚟魔笛追魂,吹奏敏實(00425)短期上升機會大,話15日內必升,今日即升畀你睇,半日炒高近12%,連帶其他汽車零件股一齊落鑊,升幅由1.6%至近一成不等。晶片股唞咗兩日,今日又嚟料,之前阿Man叫留意ASM太平洋(00522),因佢喺晶片股中算落後,半日升2.6%,但升幅唔及另一熱門晶片股中芯(00981)半日升3.4%咁好。至於其他晶片股以上海復旦(01385)半日升6.8%最厲害。

恒大(03333)許家印變賣私人家當救公司,但唔見得可以順利解決公司債務危機,內房股偶有反彈都好,整體表現仍然疲弱。物管股今日跌勢更顯著,板塊內股份只有昨日急升嘅保利物業(06049)能再接再厲升2.7%,其他物管股半日跌不足1%至超過3%不等。

醫藥及醫療股近日有資金流入,但唔少B仔股升勢過急,今日好多都要唞唞氣,但龍頭藥明生物(02269)半日逆市向上,而B仔股則個別發展,不妨留意股價走勢漸入佳境嘅康方生物(09926),半日逆市升逾2%。另一可留意嘅生化藥股為君實生物(01877),公司已經開始喺烏茲別克斯坦進行新冠病毒藥物VV116臨床試驗,並希望喺未來3至5個月內完成第1/2期研究,呢個消息有望成為股價催化劑,股價喺現水平可以收集。

麥狄文
(徐狄怡‧證監會持牌人)

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads