隔晚美股個別發展，鮑爺喺Jackson Hole會議上放鴿，令市場對收水的憂慮減退，標指跟納指再創收市新高，只有道指跌55點。不過港股表現則強差人意，中國8月製造業及非製造業PMI均低於預期，A股腳軟拖累港股低開低走。恒指低開15點報25524，其後跌幅擴大，失守10日線(25410)，一度跌428點，見25110點半日低位，創一周低位。其後跌幅收窄，最終恒指半日收報收25174點，跌365點；國指中午報收8877點，跌117點；科指跌54點，報收6336點。
藍籌普遍受壓，10年美債息率再度跌穿1.3厘，大笨象(00005)跌0.8%，友邦(01299)跌2.8%，穿晒位，走勢有啲危。最大鑊係平保(02318)，有傳聞指中國銀保監會正在調查平保房地產投資，半日股價跌7.3%，失守60大關，中午集團出咗公告，理應跌少啲，不過唔上返60都成問題，弱勢已成，暫時咪多手接飛刀，暫時係半日表現最差藍籌。另一內險股國壽(02628)半日亦跌1.7%。
內地嚴格限制向未成年人提供網絡遊戲服務的時間，騰訊(00700)梗係無運行，不過半日跌3%又唔算好大鑊，睇嚟市場對於阿爺嘅監管，由驚嚇變麻木，再由麻木變習慣，家下騰訊變咗空間上落，暫時420-470左右，呢啲位真係無乜興趣買落去。其他手遊股普遍下跌，但市場都習慣咗阿爺樣樣都要管，板塊內股份跌2%至5%不等。
電力股日升日跌，今日就向下，大唐發電(00991) 半年業績倒退超過一成，中午挫5%，其實要買電力股，要分清楚究竟新能源部份業務有務擴大及增長潛力，若然只係集中傳統火力股，睇拍都係咪搞。板塊內最有潛質係華潤電力(00836)，話晒新能源業務與日俱增，母企又係央企，回落18元水平撈貸有得諗。加上國家政策扶持環保減排，傳統火力股若然唔轉型，都係難搞。所以阿Man都係集中火力，睇返環保水務、新能源、電動車等板塊，而環保水務，呢期不防留意走勢已見突破嘅光大環境(00257)。
麥狄文
(徐狄怡‧證監會持牌人)
