雖然美股位高勢危，但較早前嘅CPI數據反映通脹壓力有所緩解，即使有聯儲銀行行長表示美國係時候收水，美股一樣先低後高，道指跟納指再創收市新高。不過港股喺科網股監管陰霾下，港股今早又走軟，10日線(26364點)失守。恒指低開221點報26296，開市即失守10日線。雖然早段曾收復失地，倒升4點，見26521半日高位，但10日線得而復失，沽壓再度增加，拖累大市掉頭跌299點，見26218點半日低位，隨後跌幅再度收窄至200點內。恒指中午報收26331點，跌185點；國指跌97點，報9367；科指挫139點，報收6579點。大市交投淡靜，半日成交縮水至673.1億元。
阿爺對科網股監管從未間斷，之前官媒用到吸鴉片嚟形容沉迷打機嘅禍害，雖然其後相關文章已下架並修改部份內容，但唔代表阿爺對科網股監監有所鬆懈。今日輪到向人民日報向直播平台發炮，指直播亂象危害未成年人，認為需對網絡「三俗」要零容忍。文章指出，主播搭訕、誘導打賞等，會對未成年人形成不良導向，應對可能危害未成年人網絡不良內容須「零容忍」，唔可以畀網絡「三俗」污染孩子純潔眼睛及心靈。
本來平台股都已經弱過藥煲，今日再畀人民日報發炮，整個板塊跌到一仆一碌，尤其視頻平台股沽壓最嚴重。阿Man早早提晒水，指快手(01024)股價跌破250元會落地獄，只係地獄有幾多層，暫時仲係未知數，今日上半場再跌3.7%，又創上市後低位。其他科網股無一倖免，騰訊(00700)跟阿里(09988)分別跌3.2%及2.8%；其他京東(09618)、百度(09988)跟嗶哩嗶哩(09626)跌0.4至2.9%不等，只有美團(03690)半日逆市升0.1%，但都唔好咁老定，話唔定下半場就由升轉跌。不過連小米(01810)都跌3%就有啲無厘頭，話晒小米唔屬於平台股，業績表現又唔差，公司回購計劃持續，只係整體氣氛偏淡下，小米升至28元水平無以為繼，又回復空間上落走勢，暫時都係25至28元之間上落，可以考慮喺25元支持位博一博。
晶片股之前係威係勢，但大摩又唱淡，魔笛追魂下，整個晶片股板塊走弱，美國隔晚相關股份已腳軟，今日港股呢邊嘅半導體股全線向下，之前阿Man叫咗唔好高追呢個板塊，唔係馬後炮，呢個板塊高追都無好結果。
今日話咁快又到星期五，望望日曆仲要咁啱係13號黑色星期五，睇嚟今日個市都無乜好搞，而近日高增長股幾乎全軍覆沒，若然真係有意入場，中國電信(00728)更新派息政策，而5G又係國策扶持嘅行業，息高兼業務穩定，可能中電信係目前市況較穩健之選。
麥狄文
(徐狄怡‧證監會持牌人)
