一起身就見到天文台發出黃色暴雨信號，又諗起聊天室戰友嗰句：落雨市就跌；再加埋單盈富基金(02800)正式更改章程，指「美國人士」不得申請或購買任何基金單位，不論是否依賴於相關美國證券法或其他法律的任何豁免。恒指隨時又碌返落去26000點，甚至樓下。Anyway，噚日尾市見五分鐘圖至小時圖Slow STC(14,3)都上到嚴重超買水平，真係臨收市前6分鐘喺聊天室度建議大家買隻Put，又係膽粗粗過晚夜。
依家9點15分，仲有5分鐘先完U盤，開視早已轉定台等睇一陣「鄧謝配」羽毛球混雙銅牌戰，同埋9點59分嘅何詩蓓100米女子自由泳決賽；今屆奧運精彩，但都唔好忘記之後仲有殘奧，佢哋都係運動員，所付出嘅努力不比其他運動員少，甚至更多！
嚟到9點31分，恒指完U盤開報26000點邊皮，跌逾200點，不過再reload一下個走勢圖，見到指數一度向下插逾300點，26000點係有失過嘅，淡倉過咗夜嘅一係食一係唔食架啫，唔食就博埋小時圖Slow STC(14,3)keep住向下，目標望住保歷加通道中軸。
見恒指似乎咬住26000點唔想放口住，又見望下恒指牛熊證街貨圖，見到今日牛熊兩邊都有唔少新增街貨層，熊證嗰邊最貼價落到26300至26399點，量就唔算好多，但勝在每層都有幾十張至最多有見220幾張喺度，反觀牛證方面見到最貼價層上到25600至25699點，不過見到中間比較多嘅層數街貨係0，怕且都係得一個原因，就喺嗰啲層數根本就無新牛證喺度，無新貨啲客又點買得到呢？
依家9點49分，喺電視仲係見到中國VS韓國嘅羽毛球女子單打半準決賽，又真係未收到Push話銅牌戰開始喎，唔知會唔會有delay啦。至於恒指，開咗市20分鐘都仲係處於26000點樓上樓下咁，五分鐘圖上嘅Slow STC(14,3)一早就由今朝嘅嚴重超買水平搶底返依家超賣位置，但小時圖嘅Slow STC(14,3)則於嚴重超買範圍見%K線落%D線，開個天線出嚟睇，就見到10小時圖依家作勢托住小時圖。
依家10點5分，何詩蓓喺100米女子自由泳奪得銀牌！得我一個喺屋企我都忍唔住大嗌咗聲！再睇返依家恒指嘅走勢，仍然都係同放低部電腦之前一樣，而小時圖都見Slow STC(14,3)明顯向下咗，不過指數都仲係喺10小時線之上，老老實實，見到個咁樣嘅小時圖真係想開佢淡倉，恒指熊(52248)，收回價26600點，同現價有逾600點差距，約31倍槓桿我都揀定出嚟啦，之不過又擔心條10小時線無啦啦有支持，算啦，我都係等睇銅牌戰好過啦！
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。
Patreon：https://www.patreon.com/cbbcwar
Facebook：https://www.facebook.com/cbbcwar
秒投聊天室：https://bit.ly/31HG6AN
