隔晚美股走個別，而今早A股亦腳軟，受中美股市兩邊夾擊，港股今早創完兩個半月高位後倒跌，恒指暫時險守29300。恒指低開53點報29414，早段曾收復失地，倒升22點，見29490點，再創3月18日後高位。無奈A股受壓，港股升勢不保，跌幅曾擴至216點，見29251點半日低位，臨近午市跌幅收窄。最終恒指半日收報29320，跌147點；國指午造10945，跌45點；恒科指跑輸大市，半日跌78點，報收8277點。
重磅藍籌股個別發展，OPEC尚未決定係唔係增產，油價再升，三桶油逆市高走，當中以中石油(00857)半日升3.1%最最勁，中海油(00883)跟中石化(00386)分別升0.9%及1.2%。友邦(01299)半日跌1.4%，重返50日線尋找支持，暫時仲守得到，要重返紅底股唔難。其他金融股普遍回軟，跌幅少於1%。
話咗平台股同科網股喺監管陰霾下，短期難有運行，最多都係有波幅，無升幅，中國市場監管總局將研究制定平台價格行為規則，平台股今日又回軟，噚日高追又中伏。不過目關股份相對尋日反彈力度，今日回吐幅度溫和，表現又至於太差。都係睇位做人，彈得急嘅有貨喺手咪不妨先減磅，待回吐再撈貨，游都幾轉水減低持貨成本。
汽車股今日見資金流入，吉利(00175)母企吉利控股，與百度合營的集度汽車，計劃明年4月將有首款純電動車登場，吉利中午抽升6.2%，為升幅最大藍籌，亦帶動汽車板塊做好。隔晚美股見電動車股先行落鑊，汽車股之前調整咗咁耐，輪到佢落鑊亦好正常。
政府發行第八批ibond，噚日開始認購反應幾好，主要係通脹持續升溫，小市民都希望買ibond抗通脹，睇嚟今次政府都會盡發，全推200億元畀大家認購。其實ibond可以話係零風險穩賺2厘息，反正放喺銀行活期存款利息得嗰一個幾毫，接近零息，抽ibond有機會兩個星期賺返一千幾百，既然政府曲線派錢，唔抽真係好蝕底，反正人人有份，點都分到一手，梗係要參與一下。至於有銀行推出超低息孖展抽ibond有冇着數，真係見仁見智。按iBond嘅分配機制，係「循環分派」，即先確保人人有一定份額，再將剩餘嘅手數以循環方式分發予認購一定手數或以上嘅人，直至手數不足以再進行下一個循環，再按抽籤形成分發餘下手數。換句話講，行人海戰術唔用孖展抽係着數啲，即係動員屋企合資格嘅人，唔使孖展認購，確保人人有份，如果一家四口，人人抽一手中一手，咁就有機會執過千銀，食餐好嘅都唔錯。
麥狄文
(徐狄怡‧證監會持牌人)
