隔晚美股回吐，不過通脹預期降溫，科技股跟中概股表現唔錯，港股喺累跌逾千點後，連彈兩日，今日進一步做好，恒指成功收復10日線。恒指高開243點報28438點，已為半日低位，開市重返10日線(約28299)，盤中最多升423點，高見28617點，並一度重上20日線(約28568)，可惜中午收市未能企穩其上。恒指中午報收28545點，升351點；國企指數報10632點，升128點；科指升72點，報7772點。
藍籌股大部份上升，只有安踏(02020)跟海底撈(06862)分別跌1.6%及0.8%，前者藍籌之中跑第尾，奇怪係中生製藥(01177)無厘頭升近5%，成為最大升幅藍籌，留意9元阻力大，上面蟹貨區唔知消化完未，有貨都要考慮要唔要閃。其他重磅藍籌以中移動(00941)升勢較顯著，公司計劃回A上市，半日升3.7%。其他藍籌股都係咁上下，升幅唔夠1%，只有美團(03690)半日升1.7%，ATMX之中跑出。
鋼鐵股抖咗幾日，調整完成今日又落鑊，發改委表示，將加大鐵礦資源勘察開發力度，加快內地鐵礦新項目及在產項目建設，鋼鐵股整個板塊做好，閒閒地升超過3%，重鋼(01053)半日更升近一成。既然鋼鐵股抖完可以再炒過，之前強勢嘅航運股，同樣整固完可以留意，阿Man就認為可以收集中外運(00598)，今年首季航空運費亦較去年平均為高，相信高運費嘅表現今年持續。公司喺空運方面增加包機擴大運力，有助其費率表現跟定價能力。技術走勢方面， 股價回調至20日線有支持，現價買入，博再向上挑戰4元至4.2元， 跌穿3.5元橫行平台止蝕，又係有數圍。
地緣政治局勢再度升溫，刺激油價走強，石油相關股又落鑊，加上有大行加持，將中石化(00386)目標價上調至4.9元，帶動其股價半日升逾4%，另外兩桶油中石油(00857)升4.5%，中海油(00883)升3%。其他油服股亦有資金追捧，不過都係嗰句，石油股唔易炒，一向唔係阿Man杯茶，反而市場可炒嘅 股份又唔係得石油股一個板塊，睇少一個板塊亦無壞。
虛擬貨幣近日走遠，金價反而升至超過三個半月高位，金礦股走高，黃金股亦落鑊，如果眾多黃金股要選一隻參與，招金(01818)暫時走勢較好，留意能否進一步逃戰9元阻力。李寧(02331)主要股東非凡中國(08032)減持股份，配售完成後，非凡中國於李寧嘅持股量由13.28%降至10.87%。李寧為本周恒指服務公司季度檢度染藍熱門之一，即然批股可掃除不明朗因素，配完又唔死得，呢啲位可以博一博，失守配股價63.8元止蝕。
麥狄文
(徐狄怡‧證監會持牌人)
