美股隔晚受壓，道指先升後倒跌，納指更跌逾2%，主要係美國證交會再重提落實推出海外公司除牌機制，隔晚中概股喺美股仆到直一直。港股今早喺一眾中資科技股再急挫下連跌四日，暫時見咗1月7日新低後喘定。恒指低開290點，開市無耐插水413點，見27505，創1月7日以來新低。之後反彈，最多倒升69點，見27988，於100天線(27925)及28000水平受阻。恒指中午收報27928點，升10點；國指半日跌97點，報收10750點；恒科指再跌153點，報收7887點。半日成交額增至1200億元，反映低位開始有買盤於27500水平願意接貨。
今日恒指能夠喺低位收復大部份失地，主要靠傳統股嘅金融股力撐，友邦(01299)全購東亞人壽，半日升3.3%，呢隻一向係阿Man較為睇好嘅傳統金融股，100日線水平收集，穿90打靶，呢隻都叫博得過。至於大笨象(00005)呢期都算穩定，喺45元水平上落，但要重返50元則遙遙無期，重磅科技股全線下跌，本來守得幾好嘅阿里(09988)因為美國證交會消息，半日急跌4.2%，又再重遊舊地，去返220元水平。雖然美國證交會已採納一項由國會制定的《外國公司問責法》，若海外公司唔符合美國審計標準，會將嗰啲公司從美國證券交易所除牌。其實阿里同京東(09618)甚至百度(09888)呢啲大型中科股，點計條數都應該合符美國審計標準，況且美股真係唔歡迎中概股的話，呢批股份亦可自己選擇於美股退市，放棄上市地位，改喺香港單一上市，又或者回A上市亦可。反而第二上市公司喺美或退市，就可以被納入港股通，吸引北水入場，阿Man又唔覺得咁樣對佢哋嚟講喺壞事。
其他喺港股第二上市嘅中科股全線下跌，新丁百度(09888)再創上市新低，萬國數據(09698)又係第二上市身份所累，半日跌3.4%創上市低位。其他科技股普遍下跌2%或以上，至於快手(01024)創上市新低反彈，講咗250有一定支持，假穿即上兼倒升，反映呢啲水平已有買盤入場，暫時可能喺250至270之間上落住先，都係嗰句，業績唔差，大行最保守都畀咗個333目標價，要去要留自己決定。
麥狄文
(徐狄怡‧證監會持牌人)
