上個星期五(2月26日)恒指下半場出溫水煮牛不停向下殺，日線圖上都已經畫到高位向下嘅「下降通道」，且以上星期五計恒指已經觸及「下降通道」底部，問題在於SlowSTC(14,3)尚未確認低位回升，所以一動不如一靜。
今早開市恒指升逾400點，開市重返29000點以上水平，至依家9點57分，恒指升幅一度收窄至得200點，到依家再擴闊返少少有逾300點，亦接近今早開市水平。
喺五分鐘圖上亦見恒指高開低走後下行至接近500分鐘線(五分鐘圖 X 100線)見支持，呢個位亦都有同聊天室嘅戰友講可以小注出恒指牛試回升；同步留意小時圖都見SlowSTC(14,3)於嚴重超賣位見掉頭，只係條10小時線(1小時 X 10線)目前成為阻力，所以如果用小時圖出恒指牛採菢蛋策略的話，都仲未係時侯。
嚟到10點9分，恒指升幅重返上400點以上水平，喺五分鐘圖上都出現咗個接近「小圓底」走勢；再加上恒指保歷加通道口keep拓闊，以及SlowSTC(14,3) keep住上行的話，聊天室今朝注恒指牛應該可以幫到大家lunch time加餸。
上個星期有兩日血洗恒指，相信部份個股亦都因為咁而變得價殘，其中一隻眼睇中咗嘅就係藥明生物(02269)。
日線圖上見藥明SlowSTC(14,3)由上週三(2月24日)至今都出現超賣再超賣嘅情況，今日終於走返入保歷加通道裡面範圍，但都要小心厤歷加通道口尚未收窄，一旦再跣腳隨時會落到100天線($90.927)附近水平，同步留意上方10天線($109.955)向下殺作勢與50天線($106.466)出「死亡交叉」。
吼價殘股就係有呢樣嘅矛盾，見到指標好壞參半嘅時侯，安全嘅可以先book mark住隻個股，心思思嘅亦都可以等今日五分鐘圖SlowSTC(14,3)回落時先至出手，藥明Call(12444)，行使價$108.88，7月初到期，引伸偏低、槓桿適中，只係要比啲心機等個五分鐘圖啫。
作者阿珊，任財經/投資版傳媒人十幾年，《鐘擺戰略贏港股》及《輪證基礎筆記》作者。用技術分析專心玩輪證，唔貪心，志在搵餐下午茶。
