執筆時恒指曾升穿二萬七，今日有成交配合，拋物線SAR本周一已發出反手造好訊號，可能資金怕好似2017年1月初就見了當年最低位，所以搶咗先算。
本欄近期反覆指本月基本是扭花，最差調整至25800，明年上半年初步看二萬八，主要是今次「50天線升穿250天線」形成的「終極黃金交叉」，威力比今年2月中更值得期待，今次的50天線斜度明顯理想得多，另外EJFQ「勢頭能量」亦較好，最重要是均線排列，100天線即將升穿250天線。若用米奈爾維尼的「第二階段」標準，目前恒指及盈富(02800)均高於50天線，50天高於150天線，150天高於200天線，而且200天線正在12月24日後止跌回升中，若這條200天線上漲至少一個月，就幾可確認最理想的「第二階段」，再配合正破壞「小圓頂」，有機會觸發「怕錯失機會」(FOMO)買盤。
技術的確如此發展，基本面及政經形勢無人有水晶球，不過港股連第三四波疫情及國內反壟斷也能捱過，除非疫苗完全無效，又或拜登敢與中國開戰，否則正如口痕友話中國建黨100周年，明年中港股市怎可以有股災？！總之，目前投資港股及MPF不妨進取一點。
很多人收入減少，希望在股場賺點幫補一下，但一定要了解自己條件及投資性格。長期以「偷雞式」買弱勢股博反彈，長賭必輸；另外，不夠貼市者確實失去很多優勢，難在Swing trade方面捕捉靚位。很多人又有以下情緒問題：一）冇買，升咗唔開心；二）低位撈貨，點知仲要跌，唔開心；三）高追被套等整固完成，途中人家升到九彩，唔開心；四）沽出有賺，點知股價再升，賺少好多唔開心。你會如此嗎？炒股不知足，經常唔開心，自然會衝動，作出很多錯誤決策，變相同市場賭運氣；偶然博中以為自己找對方法。總之你只會認為，贏錢就是對，輸錢就是錯，心法真的很重要。
明年機會可能很多，甚至細價股也很大誘惑，但沒有紀律的買賣，最後都大有可能由贏變輸。
羅崇博（杜比）
