隔晚美股個別發展，美國國會通過財政刺激方案，本來對市場嚟講係利好消息，可惜疫情喺歐美爆到七彩，美股個別發展。道指跌兩嚿，暫時險守三萬點，報收30015點；標指亦跌7點收市；不過納指再創收市新高，升65點報收12807點。港股則跟A股回升，暫時26000呢一關叫守得住。
恒指低開36點，開市一度跌47點，見26071點半日低位，其後回穩，中午收市前倒升最多125點，見26244點半日高位。恒指中午收報26235點，升116點；國企指數報10457點，升73點；恒科指創一個半月高位，半日升199點，報8386點。
阿Man推介嘅吉利(00175)今日吐氣揚眉，半日升近6%，藍籌中表現最好，不過暫時成交都係跟住大市縮水，如果可以升破24元企穩，新高可期。恒指改革諮詢展開，恒指成份股數目或增加至65至80隻，而個股權重比例最多降至8%，連成份股都量化寬鬆。成份股數目增加，追蹤指數基金將被動式買入恒指新貴，間接帶動成交增加，港交所(00388)受惠，股價半日升1.4%。不過權重嘅內銀股未來或被減持，建行(00939)同工行(01398)分別跌1.4%及0.9%。
京東健康(06618)一被納入港股通，噚日即獲2.4億北水淨流入，股價日日創新高，今日高位變咗明日低位，真係估佢唔到，半日再升8%；阿里健康(00241)亦跟住上，半日升3.3%，相對京東健康，阿里健康確係落後得緊要。JATMX又係小米(01810)跑贏，今日再創新高，半日升4.4%。京東集團(09618)終於上返啲，阿仔咁醒神，阿媽又確係落後得緊要，水漲船高點都要追一追上去；反而騰訊(00700)跟阿里(09988)半日分別跌0.3%及1%。
記得阿Man早兩個星期講咗內需股持續有資金流入，之前推介過嘅安踏(02020)同埋蒙牛(02319)齊齊創新高，分別升2.6%及3.6%。同樣有推介過嘅華潤啤酒(00291)半日升3.8%，同創新高。火鍋股海底撈(06862)、呷哺呷哺(00520)升2.3%及九毛九(09922)齊齊向上，之前跟咗推介買海底撈，可以等等博埋破頂。
2021年全國能源工作會議召開，着力提高能源供給水平，加快風電光伏發展，穩步推進水電核電建設。噚日下半場信義孖寶突然腳軟，提供咗一個好好嘅上車機會，今日兩股半日都做好，信義光能(00968)更再創新高，半日急升6.6%。另一龍頭，福萊特玻璃(06865)創新高，半日急升近13%。不妨留意埋金風科技(02208)，今日同樣創新高，相對光伏股，風電股算係落後。
麥狄文
(徐狄怡‧證監會持牌人)
