美股隔晚上升,12月開局做好,無奈港股完全唔跟。鴿派女王將接任財長,市場預期美元將一段時間處於低位,美滙指數持續走弱,反而人民幣強勢依然,令A股做好,多得A股強勢,令港股上半場跌188點後,跌幅收窄,力守20日線(約26367)。恒指高開102點報26670,係半日高位,道指期貨亞洲早市跌過百點,拖累港股掉頭向下,一度倒跌188點,低見26379點。不過20日線有支持,加上美滙弱支持人民幣走強,令港股跌幅收窄,恒指重返26500水平。最終半日恒指跌18點,收26548;國企指數收報10591,跌67點;恒生科指收報7899,跌85點。
小米(01810)上半場停牌,宣布配售10億股新股,另再發售約66億港元CB,合共集資超過300億港元。不過有傳聞指配股以下限23.7元發售,拖累唔少已累積巨大升幅嘅新經濟股下跌,主要係市場擔心配股抽水活動陸續有來。如果小米下半場復牌,股價有24元樓下又係特價上車時段,阿Man就遇咗23.5樓下搵位上車,阿Man對小米前景有信心,以其目前市值,要上一萬億睇落有難度,但增發新股再加投資者都睇好,市值過萬億指日可待。事實上之前累積巨大升幅嘅汽車股比亞迪(01211)向中證監申請增發H股,同樣係集資,半日股價急挫逾8%。吉利(00175)早前急升亦惹嚟沽壓,半日跌5.1%,其他汽車股跌1.2%至3.7%不等。
除咗汽車股,呢期弱過藥煲嘅藥股亦沽壓沉重,市場擔心帶量採購陰霾未散,而康方生物(09926)更遭股東減持,半日跌43.3%。百濟神州(06160)有股東出售151萬股ADS股份,半日急跌8.1%,不過股價落到140元水平應有支持,如果之前高位追貨而又無嚴守止蝕,嚟到呢啲價倒不如等反彈先再考慮減磅。其他生物醫藥股跌勢顯著,閒閒地跌4%,至於一對藍籌藥股孖寶,中生(01177)半日跌3.6%,石藥(01093)跌勢收歛,半日跌0.7%。暫時呢個板塊避之則吉,喺帶量採購陰影下,醫藥股暫時無得搞。
美團(03690)早段一度跌穿270元低見267.2元,明明派完成績表大行相繼調升目標價,偏偏今早股價大跌,半日跌幅收窄,美團若然能夠企穩50日線,約279元,短線應有支持。況且下周一起美團將染藍,星期五將追蹤指數被動基金掃貨,短炒可以把握機會周五食糊,長線只有坐定定。
麥狄文
(徐狄怡‧證監會持牌人)