今晚就係美國總統大選投票日，隔晚美股三大指數全部反彈回升，除咗納指彈得46點較為落後，道指跟標指齊齊升逾1%。唔知係咪侵侵跟拜登距離拉近咗，侵侵連任機會大咗，市場普遍認為侵侵若然能夠順利連任，對美股嚟講係正面嘅，皆因之前膠住嘅新一輪刺激方案有望年內落實，而一向着重股市升跌嘅侵侵，將維持對金融較寬鬆嘅監管，作為一個喺股市搵食嘅炒家，阿Man講真唔多想拜登入主白宮。
雖然有缸邊友認為拜登一向同中國FRIEND底，上任後中美貿易戰可望結束，而拜登亦講明佢一但當選，就會撤回所有喺侵侵時候所實施嘅關稅，對亞洲區股市有利，港股當然亦受惠。只不過美國對華政策，並非拜登一人可以決定，而民主黨一姐會否放過中國，而國會又係咪可以由民主黨完全控制，都將左右日後美國嘅對華政策嘅。不過想執平貨，可能要靠美國選舉結果未明朗，對大市帶嚟震盪時出手，所以之前阿Man主張要減倉，就係為咗呢幾日可能出現嘅震盪先作準備。
恒指今日高開229點報24689點，已見半日低位，成功收復10日(約24667)及50日(約24502)線後升幅擴大，連100日線(24750)，最多升587點，高見25047點，創兩個月高。恒指中午報24938點，升478點；國企指數收報10085，升148點；恒科指收報7738，升153點。半日成交額增至712億元，尚算配合半日升幅。
今日可以話新舊經濟股皆有捧場客，傳統中以友邦(01299)最功，半日升5.8%，主要公司獲批於四川建立分公司，有望喺中國市場大展拳腳，單靠友邦一股之力，已推動恒指升133點。其他重磅股除騰訊(00700)半日跌0.4%，都普遍上升。不過騰訊尋日上半場都係死死吓，但下半場一發力，即重上600元。其餘幾大重磅科技股巨頭，今日表現唔錯，至少跑贏次一線嘅科技股。
手機及晶片股今日亦見資金追捧，舜宇(02382)盤中曾升近一成，半日升近9%，藍籌股升幅冠軍。其他手設股同樣做好，不過阿Man一向話手設龍頭，舜宇睇高一線，股價表現反映咗一切，當初瑞聲(02018)先過紅底，但其後舜宇追上，再其後唔使講，舜宇家下仍保持紅底股身份，瑞聲即低位徘徊，去番40蚊即係2016年嘅起步位打回原形。而阿Man當年睇好舜宇會追過瑞聲係以用家角度去睇，幾時用家都係關心手機鏡頭質素多過語音系統，再加埋多鏡頭嘅設計，注定舜宇係後來居上嘅贏家。
至於呢排係威係勢嘅汽車股個別發展，比亞迪(01211)再創新高後回頭，重返170元水平之下，不過此股強勢未改，睇吓今轉有冇機會落番10日線撈貨。而吉利(00175)今日再升4.8%，但留意吉利廿皮樓上蟹貨仲當造過陽澄湖大閘蟹，要睇實廿皮突破唔到，有貨要識好就收。
麥狄文
(徐狄怡‧證監會持牌人)
