除咗美國新一輪刺激經濟方案，美國市場觀望緊今個星期嘅總統大選辯論，而港股升咗幾日近600點進漲後，今早偏軟，100日線(約24713)得而復失，幸而仲守住條50日線(約24581)，都算係咁。恒指低開58點，開市無耐已失守100日線，跌幅一度擴大至197點，見24556點半日低位，但50日線附近有支持，跌幅收窄至5點，見24748點，但100日線得而復失。中午恒指報收24699點，跌55點；國指中午報收10047，跌30點；恒科指半日收報7547，跌70點。
重磅藍籌股暫時繼續由內銀股撐住個市，半日建行(00939)、中行(03988)跟工行(01398)升逾2%，一見呢堆股升，其他新經濟股就唔多精神。ATMX半日只有小米(01810)開綠燈，騰訊(00700)、阿里(09988)跟美團(03690)下跌，不過阿里僅僅微跌，喺螞蟻招股上市前，阿里會保持硬淨。
金沙中國(01928)派成績表，季度淨虧損逾5億美元，但公司表示隨住訪客增加，中場業務將會復甦，半日揚4.8%，係表現最佳藍籌。其他濠賭股見資金追捧。不過都係嗰句，濠賭股業務要回復正常水平，真係需要啲時間，呢個板塊唔係話死到直，但要買就只有低位收集，切忌高追。
內地電訊股尋日叻嗰一日，今日又打回原形，聯通(00762)首三季多賺逾一成，半日反插9.8%，為表現最差藍籌；對手中國電信(00728)也急吐4.6%；中移動(00941)挫3.1%；鐵塔(00788)也降0.8%。不過呢個藍燈籠板塊跌都係好事，反而咁樣資金將回流去返啲新經濟股度。上半場唔少科技股同新經濟股見咗低位都回升，下半場可能呢啲股份會有返啲睇頭。
美股隔晚有太陽能股暴瀉，連累港股呢邊嘅光伏股插水，其實呢個板塊上星期少到咁卜下都見腳軟，當時阿Man都係話食花生算。反而阿Man呢期成日提住嘅比亞迪(01211)，半日又創新高，公司跟日野自動車，開發純電動商用車，以後又開多條新戰線，商用電動車仲有大把發展空間，比亞迪長線繼續睇好。
維達(03331)派完成績表急插，半日跌近14%，其實業績唔算差，只係管理層都話嚟緊一年半載生意難做，既然管理層咁坦白，投資者亦唔客氣，先沽而後快。至於尋日宣布摺埋港龍航空嘅國泰(00293)，半日股價都仲係向下，就算摺咗港龍減省成本亦無補於事，但公司啲原油對沖都輸到瞓直，呢三幾年都難翻身，之前阿Man叫咗千祈咪貪平。
麥狄文
(徐狄怡‧證監會持牌人)
