雖然隔晚美股止跌回升，但港股似乎跟唔到美股步伐，主要係畀大笨象(00005)抽住後腿，半日反覆低收，反彈乏力，半日喺23700水平拉鋸，好淡爭持。恒指低開15點，曾倒升73點，見23790半日高位。可惜大笨象低處未算低，拖累大市掉頭向下，一度跌156點，見23559點半日低位，再創6月1日後最低。其後大市又曾收復失地，不過中午仍要微跌，恒指半日報收23713，跌2點；國指午造9516，跌15點；科指半日收造7288，升55點，今日跑贏大市。
話咗大笨象跌勢未止，話咁快今日失守世紀供股價28元，盤中低見27.5元，一度跌逾4%，半日跌幅收窄至1.6%，險守供股底，報收28.25元。除咗大笨象，其他銀行股表現同樣疲弱，工行(01398)跟建行(00939)半日跌逾1%，而大行花旗表示，一旦大笨象被內地確定為不可靠實體，最壞情況係要出售內地投資，咁即係要放棄手上交銀(03328)股份，拖累交行半日跌1.8%。不過係金融股呢個板塊弱啲，其他藍籌表現唔太差，科技股更跟隨外圍科技股反彈。
騰訊(00700)半日彈0.3%，作為龍頭科技股佢都算水皮，不過其餘AMX，除咗之前受配股影響跌得較多嘅小米(01810)半日彈2.2%外，阿里(09988)跟美團(03690)反彈少於2%。不過睇番阿里股價表現，已經跑贏TMX，可能螞蟻集團招股在即，對阿里股價起咗支撐作用。
生物科技股今日表現較突出，習大大指中國多款疫苗優先向發展中國家提供，算得上係肺炎疫苗第一股嘅康希諾(06185)半日急升超過一成，不過阿Man要提醒大家，康希諾最大一段升勢已成歷史，280元做咗雙頂回落後，康希諾股價只有波幅而無升幅，真係唔好抱太大期望，有入貨短炒嘅缸邊友，見好要識收。
除咗生物科技股，今日光伏板塊亦見資金追捧，不過阿Man始終唔明呢個競爭咁大嘅行業，究竟有乜本事賺大錢。信義光能(00968)半日升4%，北水重倉股福萊特玻璃(06865)亦升近半成。都係嗰句，阿Man無興趣高追，有參與呢個板塊炒作派對嘅炒鬼，記住見好要識收。
麥狄文
(徐狄怡‧證監會持牌人)
