隔晚美股高開低走，三大指數又復跌，抹去上日反彈升幅，以為港股打定輸數?? 咁就錯晒喇……雖然港股上半場表現反覆，但又唔算好差，恒指高開39點後，曾反覆倒跌20點，見24293點半日低位，其後反彈拗腰，最多升142點，見24456點半日高位。恒指中午收報24416點，升102點；國指午市報收9709點，升26點；恒科指半日升54點，報收7054點。成交繼續奀豬，半日只有476.9億元。
藍籌股壁壘分明，大笨象(00005)、工行(01398)跟建行(00939)下跌不足1%，而中石化(00386)則跌近1%，跌嘅呢幾隻都係廢老股。而上半場上升嘅有騰訊(00700)、阿里(09988)同小米(01810)呢三隻科技股代表，而港交所(00388)跟友邦(01299)齊齊升0.8%，雖然唔稱得上係新經濟股，但都未至於係廢老股咁淒涼。
今日先知原來內地有人透過假離婚炒樓，阿Man唔了解國情之餘，都算 孤陋寡聞……深圳計劃推出措施，堵塞「假離婚」炒樓漏洞，內房股今早普遍下跌。潤地(01109)半日跌1.4%，為最大跌幅藍籌。不過其他內房股又唔算跌得好勁，大部份跌幅都唔超過2%。
澳門已恢復珠海居民到澳門嘅旅遊簽注，相關措施更將擴展至廣東省，或於「十一國慶」臨近前完全恢復全國旅遊簽注，估計澳門月均旅客人次有望由4月份至6月份嘅1萬人至2萬人次，大幅回升至100萬人次，料對澳門博彩收入有正面影響，濠賭股呢兩日表現唔錯。不過周末效應加上近日市況反覆，入場資金有限，濠賭股升幅唔算太勁，由1.4%至3.4%不等。
除咗濠賭股表現唔錯，科技股跟生物科技股，半日亦有不俗表現，君實生物(01877)旗下國產PD-1獲FDA突破性療法認定，中午揚4.1%；其他生化藥股亦跟大隊反彈，只係近日呢個板塊累計跌咗唔少，今日呢一彈唔算有幾幫得手。不過阿Man喺恒綜指換馬前，表示可留意海吉亞(06078)，博佢入到港股通之後，股價可再創新高，果然自北水入場以嚟，海吉亞持續上升，企得穩50元樓上收市，有貨當然坐定定。
半日恒指彈番百幾點，但目前仍未能回復升勢，可能繼續反覆上落，除咗係成交不斷縮水之外，恒指一日唔重返100日線(約24657)點，並收復10日線(約24763)，都未算得上回復強勢。反正今日係星期五，如果自問早前有減倉，家下坐得舒舒服服，建議想加碼都係過埋周末先算，大家唔好忘記無論侵侵抑或中國，都好鍾意周末期間出招，對市場走勢係好係壞無人知，情況猶如買大細，既然係咁都係按兵不動。
麥狄文
(徐狄怡‧證監會持牌人)
