隔晚美股先低後高，喺科技股強勢帶領下，納指再創新高，而道指亦喺本來受欠佳嘅就業數據拖累下跌中恢復過嚟，由跌過百點變倒升收市。A股今早亦回升，帶動連跌兩日嘅港股反彈。恒指今早高開215點，開市後升幅曾收窄至94點，見24885點半日低位。不過大市反彈力度不俗再回勇，升幅再次擴大至387點，見25178點半日高位，一舉收復10日(約25064)、20日(約24909)及50日(約24990)線。中午恒指報收25100點，升309點；國指則升81點，報收10237點；恒生科技指數則跌8點，中午報收7159點。
重磅藍籌股個別發展，友邦(01299)業績後顯著下跌，今日隨大市反彈2.6%；港交所(00388)半日升1.5%；平保(02318)跟建行(00939)分別升1.1%及0.9%。近日本港新增確診個案有下跌趨勢，昨日新增個案只有18宗，為近個半月以嚟單日最少，而今日新增個案亦只有約28宗，本地地產股借機反彈。恒地(00012)雖然中期少賺62%，但維持派發50仙中期息，股價半日升2.3%。其他本地地產股半日反彈1至3%不等。不過反彈歸反彈，始終資金對呢個板塊已不再留戀，短暫反彈亦難扭轉呢個板塊長期弱勢。
愈來愈逼近澳門放寬邊境出入管制嘅日子，缸邊友難免對濠賭股有所憧憬，而按澳門統計暨普查局資料顯示，隨住出入境檢疫規定調整，7月入境旅客雖然按年下跌逾九成，但按月計則較上月勁升2.3倍至74006人，預期喺下月進一步放寬限制下，入境旅客將進 步上升。濠賭股受捧，銀娛(00027)一直係大行最睇好嘅濠賭股，半日價升近4.7%，其餘濠賭股升幅由2.7%至4.7%不等。望一望銀娛幅圖，現價61元水平，已相當接近本年初高位，但澳門博彩業收入無咗八九成，股價竟然舊地重遊上番高位，似乎唔多合理，阿Man呢啲水平打死唔追貨，最多咪錯失機會，總好過高位被綁又做蟹。
噚日阿里巴巴(09998)交出一份優於預期嘅業績，股價半日先跌後回升，未知今次阿里能否否衝破260元阻力，但相信喺9月7 日染藍前，都係易升難跌。美團(03690)則於今日派成績表，阿Man都預咗美團同樣錄得佳績，股價於業績前炒起，有啲擔心業績公布後反而借好消息出貨，美團都要回一回氣。騰訊(00700)半日升2.6%，ATMX之中，反而早兩日逆市上升嘅小米(01810)反而今日回氣，盤中一度低見17.84元，不過17.8元為重要支持，失守將再向下考驗17.5元。京東(09618)半日再創新高，升近3%，集團有意在今年內分析旗下京東健康上市，京東較另一同期回歸港股嘅中概股網易(09999)作比較，網易只有遊戲一瓣重點收入項目，但京東相反，除京東健康外，集團亦有京東金融及可作分拆，點計條數都較網易優勝。
麥狄文
(徐狄怡‧證監會持牌人)
