熱門:

2020年6月15日 即巿股評 港股直擊

【盤房來料】疫情發展好與壞只係大市升跌藉口

之前美股炒經濟活動恢復炒到飛沙劈石,上星期又嚟個一百八十度大轉變,急升後要搵個藉口調整,又話憂慮疫情爆發第二波。講真美國疫情從未真正減退過,無減退又重燃,一切都只係解釋市升市跌嘅藉口。其實美股咁升法,估值已經有有啲高處不勝寒,能夠搵個藉口調整一下未嘗唔係好事,不過今早道期喺亞洲時段再插超過400點,其實都幾係嘢,加上今早內地公布經濟數據又差過預期,港股今日又再低開。

恒指低開310點,報23991點,二萬四閞失守,亦係半日低位,但冇再跌穿上周五低位,目前守住20日線(24036)及50日線(24026),二萬四閞失而復得。盤中恒指曾收窄跌幅至58點,見半日高位24242點,半日恒指收市報24150點,跌150點;國指報收9782,跌49點。

藍籌股普遍回軟,大笨象(00005)跌至37元,半日再跌0.7%,睇嚟40元之前個血肉長成散戶支持位,搞搞下會變埋阻力位。友邦(01299)半日跌1.3%,留意70元呢個位再失守的話,友邦將會再考驗65至68元尋找支持。

至於ATM三大巨頭今日要回氣,不過騰訊(00700)一度跌穿435元跌幅又再收窄,家下重上440元水平,反映騰訊沽壓有限,反而缸邊友都吼位上車。阿里巴巴(09988)一直未見開turbo,上周見過220元高位,可惜未能企穩進一步突破,今日又返去210元呢啲水平附近,留意210元係短期支持,失守可能又向下補口,去番200元邊沿。美團(03690)再創新高後,暫時又要調整一下,反正個市有啲腳軟,咪又落番去160元水平整固。

嚟緊又有兩隻醫療新丁上市,加上內地北京再錄確診個案,令市場憂慮疫情重燃,醫藥股同醫療股再落鑊。之前阿Man推介過上市日子較短嘅沛嘉醫療(09996)半日升逾6%,破頂創上市新高,由於呢隻半新股街貨都幾乾,破咗前高位睇嚟仲有得去。阿Man較為失望係一對醫網孖寶平安好醫生(01833)跟阿里健康(00241),今早高開後高位未見有買盤再follow,但兩股上周五都係成交配合下突破,斷估唔會咁快玩完。

內地零售股及消費娛樂股,因為疫情再爆第三波腳軟,講真呢兩個板塊就算炒經濟復甦,阿Man都未敢推介,始終今年條數肯定唔見得人,就算大市炒復甦反彈,要揀都係強勢股秤先。

 

 

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads