熱門:

2020年4月21日 即巿股評 港股直擊

【輪證贏家】VHSI反彈了

我諗今朝都好多人見到5月紐約期油跌到負數水平後嘩然,的確我都企喺電視機前諗一諗:負數?貼錢賣油?理論上又真係咁。上網搵下啲資料,睇下各路高手見解,有人話可能係電腦自動對盤對出嚟嘅價,原因係喺真實嘅世界,有乜可能賣桶油仲要補返錢比你;亦有人話正因為原油係以實物交收,喺油罐唔夠、運油輪都有限嘅情況下,難以行使期貨合約去兌現一桶桶嘅原油,於是索性將5月期油拋售,掉到負數。姑勿論咩原因都好,而事實係今朝FB上好多人都想買返桶實物原油,包括我舊同事「燈神」,上個月條友仔先掂完隻中海油(00883)Call,或者真‧燈神嘅威力係no expiry date。

10點19分,聽完林鄭講話將限聚令同部份行業停業令,屆滿後延長多14日,Well,即係話我都有機會WFH繼續延長。是但啦,反正啲功夫都係咁做架啦,恒指個圖係細啲,但都係咁睇架啦!

今朝開市恒指都係跌幾十點,或者負油價對恒指威力係正式開市後先見真章。

拆5分鐘圖就見到恒指今朝開市報24227點已經係暫時(10點25分)計全日高位,幾支陰燭向下走,至大約238XX點先見喘定,同步SlowSTC(14,3)已經好快咁落到嚴重超賣水平,且同大市同步喺低位橫行,當然如果大市抖完要再行嘅話,SlowSTC(14,3)就會出現「超賣再超賣」,因為STC無負數嘅,最多都係零。

再返番去睇日線圖,10天線(24136點)已告失守,亦即係話「楔形」不再,下望支持位數到落到20天線(23623點)。

開恒指牛熊證街貨圖,真係估唔到噚日恒指個位咁近熊證街貨,雖然重貨唔近,相比要殺牛證重貨街嚟講,叫做行少幾步路,但就真係順從技術分析向下行。都係嘅,之前有講過當技術分析VS街貨時,10次有9次都係街貨贏,或者今次就係第10次,技術分析贏呢。

喺街貨圖上,首五層牛證街貨已被大市下行逾500點(截至10點23分止)殺清,呢五層夾埋有相當於452張期指,最貼價落到去23700至23799點,呢度有相當於299張期指,若然再落多一層嘅話,即23600至23699點,就真係殺到落牛證重貨區,呢度有相當於584張期指。

手痕計條數,以目前(10點35分)恒指跌576點計,假設大市唔係下行,而係向上走,按噚日收市價24330點計,即大市上行至24906點,呢個點數放喺街貨圖上,即熊證首四層街貨會被收回,當中殺埋最多新增街貨層嘅24800至24899點,單係呢一層都已經有544張期指,多過晒恒指今日已殺嘅452張期指。

睇埋恒指波幅指數(VHSI),今日數值重返30以上水平,SlowSTC(14,3)%K線亦於超賣位升穿%D線,唔通依家就係之前估計恒指會出現大波幅走勢嘅開始?

作者阿珊,任財經/投資版傳媒人十幾年,《鐘擺戰略贏港股》作者。用技術分析專心玩輪證,唔貪心,志在搵餐下午茶。

電郵:[email protected];FB:輪證贏家

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads