熱門:

2020年4月7日 即巿股評 港股直擊

【盤房來料】傳軟庫批阿里股份套現

美股隔晚勁彈,三大指數升逾7%,理由係美國疫情有所緩和,其實美國確診數字仍然高企,睇番啲數據,只係由上周四確診3萬宗,上周五和上周六分別確診3.21萬宗和3.32萬宗,到剛剛前日周日確診宗數大幅緩和至2.82萬,大佬呀,只係減咗個一成都冇喎,咁快就咁興奮咩…….講到底,美股嘅特質就就係跌起上嚟無譜,升呢亦可以完全唔理性,皆因美國嘅程式買賣盤佔咗總成交額八成,電腦嘅嘢,無論買賣都唔會講人情,總之就係單日單向操作。

至於港股呢一開市就重上24000,恒指高開343點,最多升349點見過24098點半日高位,再創自3月13日以嚟新高。不過其後升幅收窄,24000點得而復失,一度得番46點升幅,見過23796點半日低位。中午恒指報收23815點,僅升66點;國指則報收9681點,升28點。

今早大型科網股做好,不過都中午收市都係跟番個市升幅縮水。騰訊(00700)都係企唔定385元樓上,半日升0.4%,睇嚟又要抖抖氣。至於阿里巴巴(09988)早段曾重上190元樓上,半日無起跌。今早有傳聞軟庫搵咗高盛同瑞信拉頭艦,沽出手上部分持股套現,但做唔做得成仲未知,要睇今日收市前夠唔夠飛,如果真係批得成,以試盤價180元計,阿里短線會有啲沽壓,睇嚟要重上190元企穩有啲難度。

大笨象有小股東組成聯盟要向大笨象(00005)追討損失,不過法理上大笨象又確未有違規,雖然情理上已宣布派息兼股價已除淨,確係大失人心,但班小股東要告嘅話,似乎告得入機會好低。加上更有報道踢爆有人借貸買股收息,以為喺低息環境下,可以自製年金收入,但就唔明槓桿風險,咁家下大笨象股息唔派,股價又碌咗落嚟,可以話係財息雙失。其實從來投資都有風險,仲要槓桿操作風險倍升,依家輸咗都不能埋怨,倒不如好好反省係咪投資方法出咗問題。今日大笨象個價彈番少少,但仍未重上40元,睇嚟大笨象面對盈利倒退之餘,仲要應付班小股東,真係唔死一身潺。

內需股今日反彈表現唔錯,其實喺疫情底下,阿爺都會繼續谷內需,尤其生活必需品同食品呢一類,應該會跑贏其他消費股。至於金價隔晚又急升,不過亞洲時段回吐,但無礙投資者對金礦股嘅熱情。阿Man其實一路睇好金價,而喺低息環境,以及貨幣極度寬鬆嘅政策下,黃價有價,嚟緊仲有可能喺疫情過後見通賬,所以黃金價都係睇高一線。

反而油價就真係難睇好,減產到呢一刻仍未講掂數,除咗OPEC同俄羅斯,仲有美國嘅頁岩油,所以話三桶油都係博唔過,話之你反彈又好點都好,阿Man就係當睇佢唔到。

麥狄文
(徐狄怡‧證監會持牌人)

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads