熱門:

2020年3月10日 即巿股評 港股直擊

【輪證贏家】小型股災後的彈散市?

噚晚睇住條美股,真係睇到肉都緊埋,開市無耐三條指數齊齊跌多於7%,觸發停板機制,話就話對上一次係2008年前嘅事,而我都算叫做入咗行做緊投資版記者,但說實話,真係印象唔深。

噚晚whatsapp幾個group都一齊討論美股,忽然醒起我個舊同事「燈神」(做design嗰個)2月25日晚send咗張鐵證嚟話佢趁低入市,當晚美股全日跌879點,係初期單日點數以千點起跳計嘅時期,仲話買完之後有升添;結果噚晚被我話佢「死女包,買到美股咁」,佢先再爆原來佢再對上一次買美股係兩年前嘅事。

美股三大指數跌停板,我諗呢句嘢今日都會充斥住各財經版;但心水清嘅會留意到其實噚晚恒指夜期好似平衡時空咁,講緊只係幾十點,甚至有倒升過嘅情況,所以噚晚都已經有人估今日港股唔會有啲咩事發生。至今朝起身時都見日經跌緊逾500點,但去到臨出門口返工時見到跌幅已經大幅收窄,跌百零點,到港股今朝開市反彈245點,開報25285點,Well,學啲官媒話齋:「全世界欠道期一聲『多謝』」。

睇返噚日隻恒指熊(61238),主要原因係見恒指過千點咁大裂口向下啪落去,令到恒指現價靠近牛證街貨,係無得揀嘅情況之下,估計大市點都會焗住向下行。

喺噚日11點5分至11點25分時,恒指5分鐘圖SlowSTC(14,3)見過超買位,如果喺呢個時候將隻放落場,按當時(61238)高低位$0.131/$0.114,平均買入價為$0.1225計。而恒指噚日3點打後加快下行速度,25000點更一度失守,喺下晝3點10分至3點50分計,恒指5分鐘圖SlowSTC(14,3)落到嚴重超賣水平時沽(61238)的話,按(61238)高低位$0.16/$0.135,平均賣出價為$0.1475,對比平均買入價,一來一回即日賺幅為20.4%。

睇埋牛熊證街貨圖,牛證街已經落到去24900至24999點,呢度有相當於752張期指;重貨區就喺第二層,24800至24899點,呢度有相當於1113張期指,即使無預知噚晚美股暴瀉,但好明顯係見恒指跌過千點後博今日反彈用,唯同時都估計今早見恒指開市升逾200點後將貼價牛率先沽出。

至於熊證方面,今日見有三層新層街貨層,最貼價落到去26100至26199點,呢度有相當於446張期指。如果話噚日跌過千點後,今日係技術性反彈嘅話,絕對合理;只不過依家10點13分,恒指升幅已經收窄至升44點,做緊25085點,一彈即散亦符合市況呀,恒指熊(60883),收回價26180點,市場上最貼價熊證街貨區之一嘅熊證,槓桿約18倍兼勝在街貨少,計劃再追跌嘅,最好都係等恒指5分鐘圖SlowSTC(14,3)見超買先好落場。

作者阿珊,任財經/投資版傳媒人十幾年,《鐘擺戰略贏港股》作者。用技術分析專心玩輪證,唔貪心,志在搵餐下午茶。

電郵:[email protected];FB:輪證贏家

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads