熱門:

2020年2月24日 即巿股評 港股直擊

【盤房來料】新經濟股無用怕買貨亦唔急

武漢肺炎疫情全球擴散,意大利確診數字亦超百宗,北部疫區封城抗疫;南韓一城市大規模爆發,南韓將警級別調高至最高,當地股市今早急挫3%,美國道指期貨喺新加坡黑期時段跌逾400點,亞太區股市全線下挫。

港股裂口低開203點,報27105點已屬半日高位,連最後一條移動平均線100日線(27216點)亦失守,一度跌482點,見半日低位26826點,創2月5日以嚟新低,並補回2月6日上升裂口。半日恒指報收26903點,跌404點;國指則收報10600點,跌190點。再睇睇A股半日只係跌0.3%,上證指數仍然穩守3000點之上,真係羡慕人哋唔準沽空,甚至限制沽貨,港股就無咁嘅福氣喇!

重磅藍籌股全線下跌,騰訊(00700)今日又失南非頂同馬化頂,睇款有機落去考驗50日線387.6元,而380元會有較強支持。ATM齊齊捱沽,騰訊穿400元,阿里巴巴(09988)亦失守210元,而美團(03690)則險守100元大關。不過長線嚟講,阿Man對ATM仍充滿信心,騰訊若見390樓下可吸納,而阿里巴巴就有買貴,冇買錯,基本上幾時都買得,美團100元唔知守唔守倒,跌穿100元冇有怕照入貨。

上星期講過就算賭場重開唔代表有生意,濠賭股今日跟住個市齊齊過堂,龍頭銀娛(00027)跌3.6%,藍籌之中跑第尾。其他重磅股無一倖免,暫時港股下一較大支持位喺26500點。

避險情緒持續升溫,金價今日亞洲時段繼續上揚,一度高見1679.7美元,創逾七年新高。金礦股受捧,阿Man至愛嘅招金(01818)半日升3.3%,山東黃金(01787)更升逾6%。反而黃金ETF升幅跟唔足,半日SPDR黃金ETF(02840)僅升1.6%。

手機設備股憂類供應鏈中斷全線下滑,不過其實唔算跌得甘,始終市場相信今年民用5G落地後,將會引發換手機潮,即使第一季相關股份出廠數字唔多好睇,但其後將會慢慢追上並收復失地。而內地工信部加快推進5G發展,5G概念股逆市做好,中興(00763)曾創上市後新高,股價高見34.9元,升幅接近一成,半日報收34.75元,仍錄得8.6%升幅接近高位。其餘5G概念股全線向上,而阿Man上兩個星期叫人留意可追落後嘅中國鐵塔(00788),亦突破向上,料可向住2元目標推進。

老實講個市見底未真係無水晶球答你唔倒,武漢肺炎疫情全球擴散,對全球經濟有幾大影響,暫時都計唔倒數,嚟緊呢個星期本地跟外地均有唔少重要經濟數據公布,或者可以從數據中推測。暫時都係保守啲好,即使對新濟股有信心,想買貨都要分幾注,穿咗27000唔係好事,至少可以肯定係早一輪嘅反彈已告一段落。

麥狄文
(徐狄怡‧證監會持牌人)

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads