噚晚喺屋企玩緊電話時，忽然彈出一個message：明天約了4:00pm，望望個heading得個電話冧把，心諗：邊個呀？再click埋張相睇吓，哦！原來係牙周專科診所，即係我要3點喺公司走人啦，咁[下半part]要聽日先見到面啦。
睇返個市先，今朝恒指開市報28891點，升6點；但到正式開市後升幅一度擴大，截至9點47分止，恒指暫時最高做過28972點，5分鐘見SlowSTC(14,3)由噚日嘅收市前低位回升至中軸水平，今日繼續上行走勢，去到9點40至9點45分時更升至超買位置。都講過呢期要以快打慢為主，為免夜長夢多，過咗夜嘅恒指牛(58571)先走為妙，按呢段時間(58571)高低位做過$0.057/$0.052，平均價就係$0.0545，對比噚日計落嘅平均買入價$0.05，即袋9%賺幅。
依家9點51分，除咗news team同事之外，其他嘅都陸陸續續返到，見到恒指已經由升轉跌，跌緊26點，做緊28858點。日線圖上噚日恒指高開升穿保歷加通道頂之後，今日粒燭已經走返入去保歷加通道裡面，形態上暫呈「倒T星」。其實噚日都有畫過，恒指現階段處於「中期上升通道」頂部，就算好友繼續發力，頂住恒指係29000點嘅附近範圍徘徊，但麻煩就麻煩在於日線圖上SlowSTC(14,3)同14RSI有下行之嫌。10點8分時，已見恒指跌過百點。
睇埋恒指牛熊證街貨圖，熊證最貼價嘅係29100至29199點，呢度有相當於392張期指，而重貨區就喺至29300至29399點，呢度有相當於684張期指。至於牛證最貼價街貨層就係喺28500至28599點，呢度有相當於491張期指，而重貨區就係第二層嘅28400至28499點，呢度有相當於782張期指。
用最貼價牛熊街貨位計個中間數，即(29100+28599)/2=28849.5點， 家10點12分，恒指做緊28766點，同中間位只係相差83.5點，中間位絕非一個適合落場嘅靚位，今日都係做好晒啲嘢去睇牙醫就算。
作者阿珊，任財經/投資版傳媒人十幾年，《鐘擺戰略贏港股》作者。用技術分析專心玩輪證，唔貪心，志在搵餐下午茶。
電郵：[email protected]；FB：輪證贏家
