熱門:

2019年7月18日 即巿股評 港股直擊

【輪證贏家】等爆單邊

好消息!界內證今日正式上市當然好消息啦,但我想講嘅係,經過三個月嘅牙周治療之後,噚日再上去牙醫度做第二次檢查,對比返第一次(即未做牙周治療之前嘅比較),雖然唔係最perfect嘅狀態,但親愛嘅謝醫生話滿意我呢張成績表,唔需要我做手術;「牙周病要做手術?」嚴重係要架,不過謝醫生話我康復嘅進度比佢想像中好,個半月前佢都話我好大機會要做手術,但依家都唔使,仲可以隔耐啲先至返去見佢添。為此,我噚日臨離開診所之前同佢嚟咗一個深情嘅擁抱,希望唔好嚇親佢啦。

噚日【輪證贏家】有講過:「到下朝嘅時候,如果個市未穿到個100天線(28621點)+「楔形」+「下降通道」頂,先再諗小注熊/Put,索性呢鋪揸過夜,博佢再落,專心儲肥牛啦。」雖然【下半Part】Schehule咗隻稿係講第二樣嘢,不過唔知你哋噚日有無真係見恒指穿唔過呢個位而小注熊/Put過夜呢?如果有,今朝恒指開市跌200點時,我相信你哋都已經收割。

依家10點4分,一邊同我老媽whatsapp,一路開住個恒指日線圖,線都未畫就見到恒指今日粒燭同100天線(28642點)距離愈嚟愈遠,不過仍然處於「楔形」+「下降通道」頂底部位置,呢兩條線就好似一條纜,而呢三個交易日嘅燭就好似纜車車廂,擺到明就係落緊山,山腳位暫時可以用住「楔形」底部(約28130點),一個唔該調整未完且穿埋「楔形」底部嘅話,咁再度落去就係50天線(27984點),甚至要落到去「下降通道」底部(約27800點)。

依家10點22分,恒指跌幅似乎又再擴大返,至209點,做緊28383點。開恒指牛熊證街貨圖見到,依家恒指係踩咗入下方牛證最貼價的28300至28399點,呢度有相當於327張期指,量的確唔算多,而且計一計牛熊街貨中間位(28600+28399)/2=28499.5點,同現價只係相差116.5點,換言之未必係恒指想企喺中間位,而係牛熊街貨圖距離太窄,好似包圍住恒指咁,而喺恒指嘅角度嚟睇,佢稍為郁多百零點就變成會挨近牛/熊是但一方,如果恒指要衝破呢個圍城嘅話,唯一嘅方法就係用恒指波幅指數接底反彈而形成大點數,再加上DMI嘅ADX都係觸底反彈而產生嘅力度,去出現爆單邊嘅市況。當然,需要推斷嘅係佢爆邊邊啦。

短線嚟講,恒指現水平始終都貼住「楔形」+「下降通道」頂=, Day trade或過一晚夜嘅可以吼恒指熊(50578),收回價28876點,同現價有近400點差距,槓桿比率約46.56倍適合即日鮮。

如果你都係睇淡嘅,但想再安全啲嘅話,今日新出嘅界內證就幫到你啦,因為輸極都仲有$0.25嘛。揀界內證時,如果我自己揀嘅方法,其實首先要諗嘅係你買隻underlying升定跌,因為咁係會影響到你揀隻界內證 VS 恒指現價(我當住個underlying係恒指先)係處於「下限與中間價之間」,還是「上限與中間價之間」(而我啱啱先發現商輪啲search engine無中間價,要我自己慢慢計囉...我可唔可以唔計呀?)

作者阿珊,任財經/投資版傳媒人十幾年,《鐘擺戰略贏港股》作者。用技術分析專心玩輪證,唔貪心,志在搵餐下午茶。

電郵:[email protected];FB:輪證贏家

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads