熱門:

2019年6月10日 即巿股評 港股直擊

【盤房來料】港股收復10日及20日線再挑戰250日線

美股上周五連升四個交易日,單係上周五三大指數升幅超過1%,鮑爺放鴿令投資者對聯儲局7月減息預期升溫,加上近日美國公布嘅經濟數據,確係大有條件畀聯儲局提前減息。至於貿易戰表面似緩和,但中俄之間加強合作,唔知會唔會激到侵侵紮紮跳,呢方面阿Man都係諗得保守少少。

不過市場一於少理,減息呢個消息炒咗先講,而中國外貿數據有驚喜,港股高開241點,其後升幅一直擴大。恒指重上10日線(27096點),雖然早段升幅一度收窄至189點,落過27155點半日低位,但10日線企得甚為穩妥,承接內地公布上月出口數字勝預期,刺激大市重拾升勢,甚後愈升愈急,半日最多升618點,至半日高位27583點,恒指順利收復埋20日線(27494點)。恒指中午報收27513點,升548點;國指則報收10527點,升192點。

重磅股幾乎全面向上,騰訊(00700)升3.3%,高見341.4元,中午報收340元,升2.9%。騰訊做好除咗係大市升勢帶動之外,集團旗下手遊《PUBG Mobile》及《和平精英》上月份收入按月勁升1.26倍,至1.46億美元。而再有消息指中國廣電總局更新2019年進口網路遊戲審批,而騰訊代理嘅兩款遊戲亦在審批名單上。

騰訊呢隻龍頭做好,帶動其他科技股反彈,軟件股表現唔錯,普遍錄得超過3%升幅,當中更有半新股禪遊科技(02660)勁彈兩成。手機設備股亦反彈,大部份升幅都超過2%。上周五因為好消息出貨而被沽售嘅5G概念股,今日有個別股份反彈,而中興(00763)升彈幅度達6%。

其他重磅股齊齊推高大市,友邦(01299)及港交所(00388)分別升2.4%及2.5%,大笨象(00005)升1.1%,三大內銀股則分別升1.2%至2.1%。內險股升幅較內銀股更大,銀保監表示,正積極研究提高保險公司權益資產監管比例事宜,將賦予險企更多投資自主權,可以更有效地發揮保險資金長期投資功效。

至於「三桶油」反彈,阿Man就唔多睇好,皆因國際油價持續向下,若然貿易戰持續,拖累環球經濟步向衰退,油價更加係易跌難升,三桶油反彈,係逃生減磅機會,甚至係趁反彈做淡好機會。

美國跟墨西哥暫時講掂數,避免實施關稅,貿易戰確算係緩和,而距離G20峰會尚有兩個幾星期,大市確係可以趁呢段時間展開較似樣反彈。恒指已先後收復10日及20日線,下一步將會向住250日線(27758點)進發,順便回補之前嘅下跌裂口。至於回補完裂口,兼挑戰250日線後,後市如何發展,仍要睇月底G20峰會發展如何。

麥狄文
(徐狄怡‧證監會持牌人 滙盈資產管理‧董事總經理)

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads