噚日宣布喺新地方放隻[下半part]上去,即時收到好多email同weibo悄悄話問我隻嘢放咗喺邊;到今日返嚟見到未覆嘅嗰堆email啱啱都覆埋啦,無論作為一位(前)記者或者作為一位寫手嚟講,知道自己寫嘅嘢係有人睇,確實係有啲高興;不過,今日下晝我四去見牙醫,所以[下半part]會暫停一日。
更高興嘅係噚日隻恒指熊(65576)無過到夜,喺噚日下晝見到(65576)乘恒指下行時,見有大約20%水位就即時收割,明白恒指當時嗰位其實同下方牛證好近(基本上係踩住添),但問題在於個市咁跌法,即使有再多嘅錢去博反彈,但心態上都頂唔順要同個市玩逆行嗰種壓力,倒最後即使恒指踩住牛證街貨區,但有機會由於上方熊證街貨重過下方牛證,最終或令恒指唔郁等大家落注「買大細」,又或者無啦啦反咬一口。
今日個市就係「應驗」咗後者,一早高開354點,重上27000點水平;截至依家10點8分止,恒指最高暫時做過27119點,呢口價配落恒指牛熊證街貨圖嘅話,係就係上得到熊證第一梯隊27100至27199點,呢度有相當於928張期指,屬於熊證第二重貨區架;而重貨區就喺27300至27399點,呢度有相當於1171張期指。
至於下方牛證,或者市場仲有大把人有大把錢,心態上仍然勇於捉轉角市啦,係第一層牛證街貨26600至26699點有900張期指,比噚日增口咗247張;而第二層26500至26599點就已經係牛證重貨區,有相當於1039張期指。
計一計牛熊證中間位,就係用最貼價嘅牛熊嗰兩層嘅門口位拉個平均數出嚟,即係(27100+26699)/2=26899.5點。依家10點14分,恒指做緊27017點,升256點,現價點數同嗰中間位有117.5點嘅距離,呢個距離夠唔夠扯個市上行?
依家10點23分,見恒指點數其實喺27000點附近上上,論走勢的確今日彈就做彈穿咗條「下降通道」,不過係咪咁就可以確認突破?還是假突破?咁就要問吓條10天線(27123點)比唔比佢行;或者好友們比多啲「過路錢」囉。
BTW,噚日條20天線悄悄地跌穿咗條250天線,「死亡交叉」再度出現。唔肯定今日呢粒係咪「下降通道中的陽燭」,不過未確定轉勢嘅嘢,就真係唔多搞住。
講多次,小妹今日去睇牙,[下半part]會暫停一日。
作者阿珊,從事財經及投資版報道超過10年,由平面媒體走到網絡世界,《鐘擺戰策贏港股》作者。相信技術分析,由窩輪到牛熊證無一不炒,唔貪心,志在搵餐下午茶。
電郵:gladyshan@gmail.com;Weibo[下半part]:#Gladyshan#