五時花六時變嘅侵侵，噚日又忽然改口話同中國friend過打band，對中美貿易磋商前景感到樂觀，令市場本來對中美貿易關係悲觀嘅情緒略為降溫，帶動美股隔晚急彈，三大指數反彈0.8至1%不等。隨住美股反彈，港股周二急跌後，今日跟隨美股反彈，而A股亦喘定，守住100日線。
恒指高開49點，開市冇耐升咗261點，見28383點，重上100日線(約28162)，之後內地公布多項經濟數據差過預期，升幅曾收窄至100點之內，其後升幅再次擴大。恒指中午報收28326點，升204點；國指則報收10835點，升71點。
藍籌股焦點當然係今日派季度業績嘅騰訊(00700)半日升1.2%，阿Man對騰訊業績有信心，其實大行已對其投咗信任票，業績未出就出晒報告唱好，加上和平精英一開始收費就成功吸金逾億，即使呢一季業績未反映倒出嚟，之後肯定好環境。友邦(01299)呢隻都係阿Man愛股，反彈力度都強過人，半日反彈2.7%。至於受貿易戰升溫拖累嘅萬洲(00288)及創科(00669)半日反彈5.1%及2.7%，反而貿易戰避風塘內需股旺旺(00151)跟高息股領展(00823)分別跌1.3%及1.2%。
雖然科網股分分鐘成為貿易戰嘅炮灰股，不過今日反彈表現不俗。當中金山軟件(03888)首季業績雲服務收益倍增，有大行唱好調高其目標價，股價半日升5.5%。其他科網股及手設股反彈幅度由2%至5%不等。只係阿Man認為呢個板塊喺貿易戰過程中，容易成為談判磨心，要有隨時壯烈犧牲嘅準備，所以喺貿易戰未明朗嘅情況下，不宜高追，更應該避之則吉。
醫藥股同樣係今日表現突出嘅板塊，呢個板塊受貿易戰影響較少，雖然之前受政策影響曾拖累股價向下，但始終藥品係民生必需之一，經過政策改革，反而有助行業整合，對大型嘅藥企有利，當然要揀就要揀行業大隻佬，中生製藥(01177)跟石藥(01093)係不二之選。除咗藥業股之外，家電股亦係可以考慮受惠政策扶持嘅板塊之一，同樣係唔大唔買，首選都係海信家電(00921)或者海爾電器(01169)呢兩隻龍頭。
麥狄文
(徐狄怡‧證監會持牌人 滙盈資產管理‧董事總經理)
