熱門:

2019年4月25日 即巿股評 港股直擊

【盤房來料】樓價神話延續 買陀地地產對沖

美股創新高後隔晚回軟,納指創新高後倒跌,美股雖則有企業理想業績支撐,但無其他利好消息帶動下,暫時亦步入抖氣階段。港股連跌四日後,今早偏軟,再度考驗20日線(29659點)後靠穩,跌幅大大收窄。

恒指低開138點後,其後跌幅擴大至168點,見過半日低位29636點本月低位,其後拗腰一度倒升43點,高見29849點。恒指中午報收29786點,僅跌19點;國指則跌55點,半日報收11607點。

騰訊(00700)偏軟拖低大市,其他重磅股亦普遍下跌,不過跌幅尚算溫和,普遍跌幅不超過1%。雖然話5G概念股長炒長有,但亦有抖氣嘅時候,中國鐵塔(00788)噚日創完新高後回順,今日再回吐,半日跌3.5%,成為表現最差國指成份股,其他5G概念股,如中通服(00552)、長飛光纖(06869)均跌逾1%,而舜宇(02382)及瑞聲(02018)分別跌1.1%及0.8%。阿Man一向都唔主張高追,即使板塊再當炒,都係吼回調時撈貨,著數過高追。

吉利汽車(00175)欵似被多位管理層行使股權計劃後減持,股價噚日跌完半成後,今日沽壓未止,半日再跌2.1%,錄得四連跌之餘,亦喺藍籌股中包尾,其他汽車股亦全線下跌。

香港樓價經過去年中開始調整後,今年初又再次起動,而各大行陸續出報告,轉軚睇好樓市,就連地產界嘅施永青都轉軚表示睇好今年樓價,今日資金流入陀地地產股。當中新地(00016)有滙證報告唱好,半日升2.3%,其他陀地地產股普遍長升,只有超人旗盤長實(01113)微跌0.6%。其實以估值嚟睇,陀地地產股估值仍算合理,有心唔怕遲,未夠錢上車買樓,買番陀地地產股應該係一個唔錯嘅對沖方法。

至於其他板塊都係輪流炒作,不過大市就吽吽逗逗冇乜搞作,奇怪係29500點嘅牛證街貨數目唔少,大戶竟然咁克制唔開大餐鋸牛扒,可能同呢兩日係期指結算前,轉倉活動較為活躍有關。不過結算之後就唔敢包,大戶要開牛扒餐,趁五窮六絕呢個機會亦唔出奇。

麥狄文
(徐狄怡‧證監會持牌人 滙盈資產管理‧董事總經理)

 

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads