熱門:

2019年4月17日 即巿股評 港股直擊

【盤房來料】新能源汽車迎來規模大爆發

隔晚美股表現唔錯,皆因美國跟入另一次業績期後,企業公布業績都見得下人,三大指數上升,納指更重上8000大關。至於港股今日早段都係睇住內地數據做嘢,雖然內地經濟數據表現唔錯,內地首季GDP更勝預期,港股表現反覆,跌完升,升完又跌,喺30000點附近徘徊,長假期前預咗無嘢睇。

恒指今早高開30點,其後受壓跌86點,至十點內地公布經濟數據好過預期,恒指隨即拗腰倒升45點,見過30175點半日高位再度回軟,見過30004點半日低位,逼近10日線(30002點)。中午恒指報收30062點,跌67點;國指則報收11827點,升6點。

重磅股方面冇乜特別,騰訊(00700)仍然喺400元樓下窄幅波動,中資金融股個別發展,平保(02318)整固靠穩,建行(00939)跟工行(01398)噚日急升完,今日抖氣稍稍停下腳步。港交所(00388)同樣唔上唔落,不過友邦(01299)跌1.4%較顯著,80元呢個位唔係咁易企定定。至於醫藥股亦見腳軟,內房股噚日出完內地房價走勢之後,似乎市場怕咗內地房價升勢,隨時惹嚟阿爺出手壓抑,內房股反而受壓。

至於燃氣股今早受利淡消息影響,全個板塊跌勢較顯著,龍頭中國燃氣(00384)跌近一成,其他燃氣股閒閒地跌超過3%。由於浙江省居民用氣門站價格調升6.6%,非居民用氣門站價格則下調9.5%。而有大行指發改委之前發布有關城市燃氣接駁費徵求意見稿,當中城鎮燃氣工程安裝費成本利潤率唔可以超過一成,咁搞法會拖低燃氣分銷商純利兩成。睇嚟燃氣股呢一排都無得搞,之前升咗咁多,有貨嘅都應該食咗糊,無貨就咪手多。

之前阿Man講過汽車股之中,較為睇好新能源汽車股比亞迪(01211),半日升4.5%,集團展示新能源概念車E-SEED GT,新能源汽車已進入高速發展期,未來可迎來更大規模市場爆發。股價成功突破55元後,直指60元目標,當然中線目標仍然係65元,追貨睇住55元唔可以失守。

麥狄文
(徐狄怡‧證監會持牌人 滙盈資產管理‧董事總經理)

 

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads