|
熱門:

2019年2月22日 即巿股評 港股直擊

【輪證贏家】跌市中見「黃金交叉」

今朝返工落車時,撞到同事阿Jo,二話不說喺個袋度潛咗盒嘢出嚟,我「嘩!」嗰吓應該成個九龍灣都聽到,事關佢潛咗個盒蛋出嚟個封面就係我至鍾意嘅Hello貓,仲要係80年代嘅舊版喎(即係至老土個樣,愈老土我就愈要儲)。喺阿Jo講完句:「喺文具舖買咋,最後一盒無得揀嘅。你估吓中邊隻?」買過盒蛋嘅都知道通常個盒都係印住最受歡迎嗰隻,而要中嘅話,以呢盒計就只有六分一機會(但係其餘五款都好靚,因為全部都係舊版style)。令我「嘩!」多一聲響遍九龍灣嘅就梗係六分一機會都中埋啦!本來今日個心情灰灰地,但依家忽然加上啲色彩,多謝你!

依家10點5分,恒指都開咗市成半個鐘有多,回顧返噚日嘅部署,本來喺下晝時段係有位將隻恒指牛(58656)落場,不過計計數見到恒指回落嗰吓咁啱就撞正企喺牛熊證兩邊嘅中間,為免被個市上下其手,所以都係無落到場。到今日恒指開市跌151點,報28478點;到依家恒指跌幅同點數都同今朝開市差唔多。

開埋恒指牛熊證街貨圖,上方最貼價嘅熊證係28700至28799點,呢度得番363張期指;而重貨區就上移至第四層29000至29099點,呢度有1581張期指;不過,喺第二層28800至28899點呢度都有1509張期指喺度,未知今日見市跌又會唔會走咁啲?

至於下方牛證,噚日喺[下半part]都有講過:「下方牛證愈嚟愈貼價,而且見個市呢期大方向好似一條直路向上咁,追貼牛博再升(那怕只係100、200點),用高槓桿嘅原理去迫大個賺幅,如是者下方貼價牛好有可能聽日就會變成新重貨」。今日睇返啲牛牛,下方最貼價嘅28300至28399點有652張期指,雖然唔係重貨(重貨喺28100至28199點,有976張期指),但呢part係最多新增期指張數呢一層。以依家10點15分恒指最低暫時做過28430點計,只要個市向下行多31點,就即時進入牛證第一梯隊28300至28399點。自1月7日開始恒指沿住條10天線上行至今,當中都有部分日子同條10天線好鬼貼,更有兩日係穿過添,so what?

換言之,如果進取到連個十百幾點嘅下行都唔放過嘅話,你當然可以入熊/Put;但以呢度行穩陣路線嚟講,就梗係唔郁啦。

要留意一樣嘢就係10天線(28332點)經過一番努力之後,終於升穿條250天線(28296點),發出「黃金交叉」嘅,要注意嘅係一條短平均線升穿一條長平均線所發出嘅利好訊號,唔係兩個回合就結束。就當個市真係落一落去28300至28399點食嗰堆街貨,喺日線圖上佢只係「係咁易」跣一跣腳穿吓條10天線咁大把。

作者阿珊,從事財經及投資版報道超過10年,由平面媒體走到網絡世界,《鐘擺戰略贏港股》作者。相信技術分析,由窩輪到牛熊證無一不炒,唔貪心,志在搵餐下午茶。

電郵:[email protected];Weibo[下半part]:#Gladyshan#

回上

信報簡介 | 服務條款 | 私隱條款 | 免責聲明 | 廣告查詢 | 信報會議中心租賃 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。