美股隔晚個別發展，蘋果業績又唔錯，科技股叫做頂得住，市場觀望今晚聯儲局議息，雖然已預期唔會加息，但議息後嘅新聞發布會先至係焦點，市場等待鮑鮑講話，睇吓搵唔搵到今年息口路徑嘅線索。除咗議息會議之外，市場當然關注中美貿易談判發展，本來都預咗談判結果都係咁上下，始終中美雙方嘅分歧咁大，唔係咁容易完全解決，但下陣美國喺呢一輪談判開始之際，又話要引渡華為公主，連同華為公司夾埋被刑事起訴23宗罪。即使美國一再解釋並非以華為事件作為談判籌碼，但解釋等於掩飾，時間上嘅巧合，實在好難說服人兩者毫無關係。
今日期指結算，恒指略為高開39點後，曾倒跌過百點，見過半日低位27369點，但27300點由之前嘅阻力，變為呢一刻嘅支持，加上人民幣回勇，對中港股市有一定支撐作用，港股再度回升，至中午收市前重上27600水平，見過半日高位27631點。中午恒指報收27610點，升78點；國指升22點，報收10890點。
人仔持續走強，終於輪到內房股落鑊，幾隻重磅內房股包括中國海外(00688)、華潤置地(01109)跟碧桂園(02007)分別升3.9至6%，係表現至強藍籌股。不過阿Man堅係唔多buy內房股，佳源(02768)之前被傳債券爆煲冇錢還，雖然公司已證明債券未有出事，但大股東押股係事實，股價插水兼停牌，到家陣都仲拉緊閘未復牌，內房股嘅債務問題空穴來風必有因，兼且今年係唔少內房股債務到期嘅高峰期，唔知下一隻又輪到邊間公司手緊出事，所以炒內房股都係跟勢短炒算，即使睇好呢個板塊想搵隻好股睇中線，都係集中睇住幾隻重量級嘅內房股算數，次一線嘅二三線內房股不提也罷。
諗住呢期中資金融股表現唔錯，冷不防國壽(02628)忽然間發盈警，話佢係內險股中嘅狗股都冇乜點錯。股價之前由十五六蚊開始展開反彈，可惜股價連廿皮都見唔番，家陣仲要發盈警，半日跌逾2%，藍籌股中跑第尾。
阿Man之前話睇好家電股，有發改委表態支持行業發展，噚日再表示支持綠象及智慧家電銷售，促進家電產品更新換代。發改委並續指對購買一級能效嘅變頻空調、冰箱、洗衣機及平板電視等產品，對消費者給予適當補貼，預期未來三年可拉動約7000億元人仔嘅消息。早兩日板塊個別發展，之前升得升嘅創維數碼(00751)同TCL電子(01070)回吐後，雙雙喺10日線見支持，今日回勇再發力，預期整固完成後可再展升浪。
至於指數喺結算日又上又落，得番兩個半交易日又過年，而北水今日開始休戰，小心大戶趁成交有機會縮水，又嚟招好淡通殺。雖然牛熊證街貨都仲係側埋一邊，但之前極度凋零嘅牛證街貨，開始喺27000至27200左右聚咗過千張期指，只要貿易戰同華為事件有乜風吹草動，都可以成為考驗二萬七水平嘅一個借口。暫時期指支持位喺27200至27400點，上面27800點阻力暫未能突破，幾百點上落上下其手，咪以為波幅細咗無有怕，唔覺意過夜爆出突發消息，裂口上下幾百點係濕濕碎。
麥狄文
(徐狄怡‧證監會持牌人)
