今朝同平時差唔多時間出門口返工，講緊返到公司大約9點45分到，喺樓下就已經見到平時10點打後先蒲頭嘅designer同事，我仲以為自己睇錯鐘添；上到樓無幾耐就收到送貨叔叔嘅電話，收到份件一打開，嘩！係輪商朋友Dick同Winnie寄過嚟嘅利是封，佢哋今年行中國刺繡風，上面有花有鳥，其中一款鳥我認得出同我細個時見到我阿婆個枕頭袋嗰對水鴨(定鴛鴦)係一樣架，連個盒都靚過人，好彩你寄咗三長三短比我，咁我就可以一pack儲，兩pack用。真心鍾意，多謝。
好，講返個市，話說當日(早兩日啫)見到隻友邦(01299)一個put樣，於是就膽粗粗博隻高槓桿嘅友邦熊(66189)，結果？同total loss都無乜分別，於是嬲嬲地唔理佢，而為咗唔被呢件事影響本小姐嘅心情，於是噚日一班人去咗九龍城食泰國嘢(再加埋今日堆利是封)，心情上reborn得八八九九，只係隻(66189)未reborn啫，「做乜唔放？」都反正去到呢田地，放同唔放都無乜分別，當一個人輸到無嘢可以再輸嘅時候，先至係最豁達嘅時候呀！
「咁買落唔得咪買上囉。」可能好多人都會咁做，但我又唔會喎，學讀者Walter話齋：「有時唔順最緊要識閃避，做下旁觀者，鬥氣通常會出事」呢句說話我係贊成到極點，因為抱住呢個心態再落場嘅話，做錯決定嘅機會率同滴露消毒殺菌一樣，都係99.9%。(如果我噚日真係零理智地走去反手追Call，咁我就真係被個市左一把、右一把啦)
啱啱回覆咗讀者阿輝嘅email，佢同我一樣都係抱住一個報(66189)仇嘅心態，仇就當然要報架啦，但都要睇時機。事實上依家睇返啲日線圖同街貨圖，出現嘅情況就係：日線圖上敏感度高嘅SlowSTC(14,3)出現超買，甚至係嚴重超買，但係街貨圖上就見到上方熊證仲有成揪街貨喺度，有乜可能唔殺？如是者「超買再超買」嘅情況就出現，跟住就開始出現一個Loop >市愈升> 人愈買Put/熊 > 熊街貨愈多 > 市愈要向上行食熊證街貨 > 「超買再超買」情況持續 > 市再升...不過，呢個Loop終有一日會完，因為呢個世界係無一個只升不跌嘅market嘛，咁幾時先完？或者等到個市升到啲人唔敢再Put/熊證，令上方熊證街貨量減少；同時見到個市升到咁火紅火綠，於是有資金轉軚買升(即係買牛證/Call)，貨嘅方向一轉，變成上輕下重嘅話，咁大戶要交數嘅大前題之下，就自然再掉頭架啦。
幾時先出現呢個情況？你見仲有咁鬼多熊證街貨就知依家仲loop緊啦；「咁快手博一鋪炒上又得唔得呀？」你真係有咁快手至好。
作者阿珊，從事財經及投資版報道超過10年，由平面媒體走到網絡世界，《鐘擺戰略贏港股》作者。相信技術分析，由窩輪到牛熊證無一不炒，唔貪心，志在搵餐下午茶。
電郵：[email protected]；Weibo[下半part]：#Gladyshan#
