隔晚美股又大玩過山車，道指喺boxing day勁升逾千點後，以為點都有follow，誰知美股隔晚一開市即插水，由開市插足611點至接近收市前半粒鐘又玩鯉魚翻身，唔使半粒鐘時間倒升260點收市，單日高低位波幅超過800點，仲要喺咁短時間內搞掂，都咪話唔係另類奇蹟日。查實隔晚美股咁樣畀人做世界，一啲都唔難理解，皆因聖誕假期過後下星期又緊接新年假期，假日情懷濃厚，交投淡靜，大戶要舞高弄低做世界易過借火。
困擾美股主要係聯邦政府局部停擺，侵侵口口聲聲炮轟民主黨，表示美墨圍牆撥款唔獲批，佢會不惜一切代價，即係話之政府要停擺幾耐，總之就合佢老人家心意。侵侵嘅霸邊大家都習慣，但咁搞法投資市場又豈能放心，加上另有報道指侵侵考慮簽署行政命令，禁止美國企業使用華為跟中興通訊(00763)嘅設備，都不利大市。不過美股尾市咁樣拗腰，可能同鐘擺效應有關，加上美股家下超過八成交易由電腦操盤，只有電腦操盤先會出現暴力式沽貨同掃貨，指數自然亦大上大落。
至於港股喺期指結算日繼續淡靜，美股死過翻生，港股隔晚喺夜期死完，ADR加保不失，去到新加玻黑期時段回升重上25500水平。恒指高開23點，報25502，開市後最多升110點，半日高位見25589，之後一度倒跌62點，報25416半日低位。恒指中午報25502，升23點；國企指數升8點，報9999。
其實睇牌面，喺25000至25300點係牛證街貨重貨區，而熊證街貨重貨區最近喺25900至26099點，挾埋條數都未夠牛證街貨重貨區一半，純講屠殺牛熊，點都係殺牛誘因大啲。可能係期指結算，而美股又玩拗腰，港股上半場仍然頂住，但下午三點過後，個結算價塵埃落定，唔排除大戶做世界。
重磅股無乜睇頭，少咗北水入場，本來上星期生生猛猛嘅騰訊(00700)亦無晒精神，暫時叫守住喺300元樓上，但已無晒上升動力，久守必失，擔心結算過後，騰訊或者被開刀。要數呢期最弱嘅重磅股係平保(02318)，連跌八日後，今日仍然無起色，現價距離8月份底位好接近，睇怕佢最有可能行先一步較大市先創年內新低。反正仲係放假mode，加上下周一只得半日市，咁嘅市況繼續靠邊站，或者提早熄機走人，享受下面嘅冬日陽光。
麥狄文
(徐狄怡‧證監會持牌人)
