話咁快又到星期五，過去一星期港股成交少得可憐，臨近聖誕及新年長假，唔少缸邊友早已提早收爐放假去玩，少咗人參與，成交淡靜好正常。不過美股嗰邊就食錯藥咁款，大家早已預期聯儲局12月會加息，但一落實加息，本來已弱過藥煲嘅美股如倒水一樣，連續兩日插水唔識停，道指更跌穿23000點，跌勢急且猛。華爾街跟侵侵一樣，唔多高興聯儲局加息之餘，更未肯放鴿，明年雖計劃加息次數減至兩次，但未結束加息周期，擔心市場流動性收緊，避險情緒自然升溫。查實美股係要插水，即使聯儲局跟環球其他央行背道而馳，宣布結束加息周期，華爾街可解讀作美國經濟準備仆直，一樣冇面畀。
美股連納指都入埋熊，港股仲邊樹有運行，早段恒指低開逾百點後，一度跌309點，見2531點盤中低位，創下一個月低位。不過喺騰訊(00700)呢隻過氣股王拗腰回升之下，港股收復大部分失地，半日跌幅收窄至53點，報收25570點；國指萬關失而復得，中午報收10017點，跌73點。
噚日阿Man喺社交平台表示，騰訊喺300元水平應有不俗支持，雖然今日低開298.2元一度失守低見297元，但呢一下假穿反而畀個機會大家有個好位博反彈。海南明年將打造國際電競比賽及遊戲交易博覽會，另外2018中國遊戲產業年會召開，中宣部出版局副局長馮士新喺會上表示，首批送審遊戲已經完成審核。之前騰訊跌到一仆一碌係因為手遊遭封殺，如今有機會解封，亦大條道理反彈。半日股價倒升近4%，又係單天保至尊撐起大市。其他網遊及手遊股亦全線做好，普遍升幅超過3%。不過其他科技股無咁好彩，手機設備股續跌，瑞聲(02018)更創近三年低；新經濟股沒有最低只有更低，加上納指步入技術性熊市，科技股呢期可以擺埋一邊唔使睇。講咗N咁多次，醫藥股連反彈都無得博，今日喺其他板塊開始止住跌勢之時，醫藥股繼續捱沽，雖然唔少跌幅喺半場收市前收窄，但弱勢已成，博反彈亦唔見得有乜着數。
港股呢個月只係剩低兩個半日市加兩個全日市交易日，本來阿Man諗住話晒年結月，港股大有條件彈高少少，可惜如意算盤打唔響，恒指未能企穩二萬七之餘，更連失多條移動平均線，主要係外圍股市表現太差。港股能否喺剩餘幾個交易日內扭轉乾坤，暫時牌面睇情況唔樂觀，要結算重返二萬六點，首先今日大市要企番穩喺25600點之上，呢個位亦係近日嘅好淡分界。企唔穩25600點，咁就要問問大戶仲有冇興趣食埋25000至25099嗰一級牛證街貨，呢個位亦係目前牛證重貨區位置。根據往績紀錄，大戶由27200水平殺近二千點至25300水平，已食咗大批和牛夠晒飽，好多時無論殺熊或劏牛，總會遺下一區死剩種，今次未知大戶會否一如過往放生呢一級肥牛。下周一平安夜得半日市，阿Man個心早已散鬼晒，假日情懷籠罩住，一於happy Friday，今日一收市衝去搵老友happy hour。
麥狄文
(徐狄怡‧證監會持牌人)
