今朝響鐘未響我隻眼就響，唔知做乜痛到勁標眼水，我家老爺又係二話不說同我衝落街買支眼藥水比我，但滴完都仲係痛，一照鏡就見到自已隻眼皮裡面有一撻紅色嘢，初初仲以為係自已隻眼損咗結痂，刮到自已隻眼痛，反正公司有保險Claim睇醫生，唔慳Lu，衝落樓下睇醫生，一比醫生睇完就話我眼發炎，依家滴完醫生啲眼藥水先叫做好番少少。
搞完一大餐依家10點48分，完全無唔知個市升定跌；返到屋企開返部電腦就見到恒指個分鐘圖今朝急插完之後係咁飆，日線圖睇恒指暫時呈「十字星」，落到去保歷加通道底(25309點)附近，SlowSTC(14,3)就已經踩到入嚴重超賣水平。時近年尾已經連環輕食咗兩餐恒指熊，到今日講真再落場嘅心思都已經無，反而大家都應該準備過聖誕同做冬；【輪證贏家】都做埋今日就收爐。
剛剛收到讀者Andy嘅email，佢認為個市應該仲有氣息可以反彈返上去，問我有咩股份可以留意同準備。坦白講當前環境唔係咁好嘅時侯，除非你玩cash is king，否則防守性股份幾乎可以話係不二之選，記得好似早幾日睇返自已公司同台做嘅一個節目(請咗龔成上嚟嘅，但唔記得邊集啦)佢講到大家可以搵一啲同你生活息息相關嘅股份去做投資，最大路就更係莫過於水電媒啦，而領展(00823)旗下啲街市檔，我都有幫襯架；每日放工我都係幫襯港鐵(00066)架。沿住呢個思路諗你慢慢就會發現好多，再從中做比較，邊啲生意勁啲，邊啲派息高啲、穩定啲同埋最好年年都有加無減啦。
最後，如果大家有印象或者係老手嘅話(我唔係話自已係老手，我只係有印象嗰邊啫)，每年新年港股都係咁易開一開個紅盤高興吓，「乜唔係農曆新年先有咋咩？」對我哋身在國際大都會而又有中國節日假放嘅香港人，相信大家都習慣咗有兩個新年假放，農曆新年同新一年嘅新年大家咪又係喺度倒數，依家聖誕都倒數啦，怕且遲啲可能連中秋都倒數。Any肥，趁住個恒指挨近保歷加通道底，或者比埋下個星期佢，小注一Call博開個紅盤高興吓(早彈早嘅咪早享受，唔彈先輸兩舊啫)，再穩陣啲嘅就等埋條SlowSTC(14,3)堅到底先做嘢；再再穩陣啲嘅，求吓你熄機唔理個市，埋單計數啦。
【輪證贏家】同小妹今日收爐(上面講咗啦！)；有句未講嘅：祝各位聖誕快樂！新年進步！年輕人，出街玩同落場一樣，都要小心啲；唔出街玩嘅都一樣要小心，係要小心身體，咪搞到好似我咁年尾流流喉嚨咳完又到隻眼出事呀！
出年見！
作者阿珊，從事財經及投資版報道超過10年，由平面媒體走到網絡世界，《鐘擺戰略贏港股》作者。相信技術分析，由窩輪到牛熊證無一不炒，唔貪心，志在搵餐下午茶。
電郵：[email protected]；Weibo(下半part)：#Gladyshan#
