等了又等，阿爺終於出手救市，只不過今次狼來了嘅故事試得太多，A喺對上兩次人行宣布降準後表現強差人意，4月一次彈完即散，6月嗰次同樣無效，今次A股彈都唔識彈，一開即瓜，至於港股呢，高開低走，半日仲要插水0.8%。
恒指高開145點報26718點，已經係半日高位，開市冇耐因A股一開即瀉，港股亦由升轉跌，盤中一度低見26263點，接近9月低位26219點，中午報收26345點，跌226點；國指則跌84點，報收10446點。A股更大劑，低開後反覆偏軟，上證中午報收2738點，跌83點接近3%。其實A股今次完全彈唔起亦唔難理解，市場對於阿爺救市已深知肚明，愈救愈驚，愈救愈墮落。人行再放水，令人民幣下行壓力仍在，人民幣離岸價喺6.9徘徊，而中國外滙儲備連跌兩個月，反映資金持續流走。加上今次降準力度加強，市場解讀為中國經濟下行壓力增加，嚟緊公布嘅經濟數據肯定唔多好睇，咁嘅情況下，仲點會有水肯入場再接貨。
騰訊(00700)盤中一度低見299.8元，考驗300元大關，半日報收302元，其他新經濟股除咗美團(03690)逆市上升，大多數都係低處未算低，持續向下尋底。以為人行再降準，對內銀跟內房股可帶來支持，但內銀股只有農業銀行(01288)逆市升1%，其他建行(00939)、工行(01398)跟中行(03988)高開後倒跌，喺A股跌得更厲害。大笨象(00005)跟友邦(01299)則逆市上升，不過整體市況下行壓力大增，咪即管睇睇呢兩隻重量級金融股頂得幾耐。
內房股同樣未受惠降準，無論係旗下數個樓盤據報因降價引發業主維權嘅碧桂園(02007)，股價跌至超過一年低位，半日跌近半成。至於今個頭九個月銷售額大增55%嘅創融(01918)，股價同樣跌4.5%，其他內房股閒閒地跌3%或以上。
除咗內房股內銀股死死呀，中國經濟前景黯淡，要靠內地豪客先撐得起嘅濠賭股，畀大摩調低澳門今明兩年賭收，整個板塊下跌，即使金沙中國(01928)獲調高投資評級，股價亦要跌2.6%，其他嘅濠賭股跌幅更大。之前阿Man已叫咪多手接濠賭股，跌勢尚未完，暫時仲未係時候撈貨。
睇嚟港股短期都係大插小彈，短線支持位喺26200點，一旦呢個位失守，下一目標係25800水平，亦係之前提過嘅由2016年延伸升浪至今年1月頂部嘅回調黃金比0.5，即25844點，若然呢個位都守唔住，黃金比0.382有得見，嗰個位講緊係24064點。至於反彈的話，今日上半場見倒26800都過唔番，當一失守26550-26650點上周其中一個密集區，又再倒水，同樣道理一旦再失守上月低位26200水平，直接25800冇走雞。
麥狄文
(徐狄怡‧證監會持牌人)
