隔晚美股繼續做好，道指再創收市新高，主要係美元強勢，美國10年期債息急升至3.18%，30年及5年期債息亦全面向上，債價插水，令資金棄債買股。美滙指數突破96關，新興市場貨幣又再面對龐大沽壓，印尼盾跌勢未止，再創20年新低；印度盧比亦創逾20年新低，印度央行出手干預，但兩地股市皆顯著下跌，股滙齊插水。至於人民幣唔使講，跟住大隊一齊貶，人民幣離岸價喺6.9大關企定定，暫時未見人行干預手影，莫非國慶黃金周現咗先講，話之人仔企穩6.9亦懶理。雖然港滙未重見7.85弱方兌換保證，但滙價亦正回軟，至於港股梗係唔使講，經過周二大屠殺後，缸邊友驚魂未定，今日淡友再大開殺戒。
恒生指數低開61點後跌勢轉急，開市價27029點已屬半日高位，二萬七關甫開市即失守。半日最多跌492點，低見26598點，回補9月13日遺下嘅上升裂口。半日報收26635點，跌456點；國企指數半日收報10556點，跌229點，跑輸大市。恒指短短三個交易日急挫逾千點，恒指繼2003年沙士之後，再次跌低於道指，以恒指半日收市價計，現價較喺新加玻交易中嘅道指約26750點，低咗足足成百點由於美股近年幾以嚟，遠遠跑贏港股成條街，尤其係港股自從跟咗A股之後，對於美股就只識跟住向下走，向上走呢就冇份。
所有成份股只得四隻逆市升，其餘齊齊過堂插水，友邦(01299)半日再跌3%，大笨象(00005)亦跌0.3%，息口趨升亦木未能成為呢類國際金融股嘅護身符。至於內地金融股，內銀股全線向下，跌幅超過2%，內險股算係跌得少，平保(02318)半日跌1.2%，不過一旦追番跌幅，失守75元後，要落番去72元話咁易。油價持續強勢，紐約期油更創新四年高位，不過今日石油股跟油服股亦難逃一跌，不過喺油價高企之下，呢個板塊將持續跑贏大市，遇上反彈亦會行快一步。
要數最慘情股份，新經濟股認咗第二，無其他板塊認第一，小米(01810)繼續尋底，眾安(06060)再創新低，半日跌逾5%，閱文集團(00772)半日跌2.7%，估計前底好快失守。呢啲新經濟股咁嘅表現，即使騰訊(00700)宣布QQ音樂亦未能沖喜，半日價再跌2.1%，前底305元應該無乜支持，失300元心理關口，下一個月位可能要落到275元先有得停。
賭業股跌到一仆一碌之後，呢兩日借黃金周內地旅客數目增加27%呢個藉口反彈，不過都係嗰句，內地經濟預測被一再下調，靠內地客撐起博彩嘅濠賭股，前景未免受拖累，反彈千祈咪受誘惑多手買貨，反而仲有貨喺手，好趁呢啲機會盡快跳車。
