噚日今朝早揀咗隻恒指熊(61453)同恒指熊(69343)出嚟，主要原因係因為見到日線圖上恒指下行跡象未減，10點初到就交咗稿，見個市開始倒升，「特價熊時段」就開始，至到10點30至35分，恒指5分鐘圖見SlowSTC(14,3)見到超買，(61453)同(69343)呢個時間高低位分別做緊$0.045/$0.037同$0.075/$0.068，拉個平均數當係入市價就即係$0.41同$0.071。
入咗貨無耐(其實由11點35分至到下晝1點10分)，SlowSTC(14,3)由朝早嗰吓超買火速下行到落超賣，按一貫策略(61453)同(69343)會喺呢段時間收工，同樣用高位低拉個平均數作為賣出價計，即賣出價分別係$0.0635同$0.0935，平均賺幅就係54.36%同30.8%。喺見個市再無力下行嘅情況之下；再加上都有咁高嘅賺幅，於是就無再追貨。
至今朝開市，恒指跌61點，仲以為無乜嘢之際，差幾步路就到個位時，就收到message話恒指跌400點，嘩！果然係跌市容易升市難，根本就唔需要用力嘅情況之下就將個市向下插咗落去，依家10點27分，恒指最低做過26598點，用2點嚟穿26600至26699點嗰千幾張重街貨，雖則見到呢個點數都不禁話個市絕，但2點實在多咗，再準啲0.1點都已經足夠。
日線圖上恒指繼續下行，但經過連跌插之後恒指條SlowSTC(14,3)都跌到落中軸至接近超賣水平，9MOM見負數，而MACD亦見「雙熊」。值得留意嘅係，DMI條ADX由噚日嘅24.208升至今日嘅25.397，雖則呢粒數都係今日第一日見跌市而升，且今日仲未完嘅，不過ADX升即暗示市跌係有力地跌，噚日講話恒指分分鐘見保歷加通道底(26285點)，難道不是夢？
再睇埋牛熊證街貨，26500至26599點呢堆牛證目前係最貼價，有相當於872張期指，再數落去保歷加道通底附近(就當係26300至26399點)呢度就只得265張期指，唔算叫做多，但係再落26100至26199點呢度就有844張期指，呢part就係第二重貨區，「如果個市落到嚟呢度咪即係穿條保歷加通道穿得好緊要囉？」咁諗，如果個市繼續下行嘅話，咁條保歷加通道都會同個市一齊下行架嘛，你睇返噚日保歷加通道底都仲有263XX點，今日就得返262XX點就知啦，所以就算穿都唔會穿到咁狠嘅。
雖然係咁，但呢個位再追跌嘅話，一來賺幅未必再有之前咁勁，除咗技術指標回到落中軸至接近超賣水平外，仲要小心恒指波幅指數(VHSI)彈到上超買嘅時候回塘，咁個市嘅波幅就會縮細，輪嘅話先係有機會縮Vol先；其次係當輪商追住出返貼價熊證比個市時，唔排除仲有遲鈍錢或者貪心錢追貼價熊，博個市繼續向下炒，但無留意到大市下行嘅力已經開始行得八八九九時，一個屈尾十個市彈高少少，貼價熊就會即死，所以，再追跌先有個心理準備就係：有得食就食，速度要比之前更快，其次係買收回價同現價至少有700點差距嘅熊證，你見呢幾日個市求其郁一郁都已經有400至600點波幅出嚟就知咩事啦。不過依家勢間最貼價嘅熊證收回價同現價有880點差距，即係輪商仲未出到貼價熊出嚟啫，恒指熊(61436)，收回價27650點，同現價有逾1000點差距，同樣見5分鐘圖出現超買先好落場。
作者阿珊，從事財經及投資版報道超過10年，由平面媒體走到網絡世界，《鐘擺戰略贏港股》作者。相信技術分析，由窩輪到牛熊證無一不炒，唔貪心，志在搵餐下午茶。
電郵：[email protected]；Weibo：#Gladyshan
