噚日朝早公司一部S品牌嘅拍攝用手提Cam「Boom、Boom」兩聲着晒火之後，由於成層office都有一陣燒膠嘅臭味，嗱嗱聲搵地方避一避，而避難之前就揀咗隻中國平安(02318)嘅熊仔(64620)出嚟，仲話要等分鐘圖見超買先好出手。
睇返平保5分鐘圖，噚日朝早10點45至55分嘅SlowSTC(14,3)的確有出現過超買，呢個時候(64620)證價做緊$0.051至$0.052；再過多大約一個鐘，即係朝早11點35至55分呢度時間，平保分鐘圖上嘅SlowSTC(14,3)由此前嘅超買回到落去超賣，如是者一個Swing trade就喺呢個鐘頭做完咗，按(64620)呢段時間做過$0.053至$0.058嘅話，即係一個鐘頭之內最盡就可以執到七格；若然你揸到點幾先嚟走嘅話，(64620)仲見過$0.6X添，不過嗰時你會發現平保個股雖然向下行緊，但係條SlowSTC(14,3)又彈緊上去，一個背馳樣，通常都有你無你，走咗人袋咗錢先至最重要。
再睇番今日個市，恒指今朝高開163點，開市報27879點；依家10點2分，最高暫時見過27927點，升106點，做緊27821點。開埋日日都睇嘅牛熊證街貨圖，就見到27900至27999點呢27張期指真係要唔要都罷，反而最吸睛嘅就係28000至28099點起步上，至28200至28299點，呢度三層街貨各有過千張期指進駐(大家望一望張街貨圖就明架啦)，根本呢三層同肚腩嗰堆肥肉係無分別，如果現價向上478點嘅話，就可以食得晒堆肥肉，呢度夾埋有相當於3650張期指。有不錯嘅街貨量而向下殺嘅話，我哋會話食肥牛，再靚啲嘅就叫做雪花肥牛；依家反手向上，仲唔係雪花肥熊？如果真係有呢樣食物，我都想試吓。
至於下方啲牛仔，要數到落27200至27299點先見重貨區，呢度有1321張期指，但再落嘅話街貨就真係無上方熊證咁多，呢個就真係只可以叫肥牛咋；BTW，同現價相差成600幾點，今日期結，就比個面啦。恒指牛(67138)，收回價27238點，同現價有逾500點差距，約42倍槓桿先至係亮點，附近隔壁左右都無咁勁，5分鐘見超賣就入。
作者阿珊，從事財經及投資版報道超過10年，由平面媒體走到網絡世界，《鐘擺戰略贏港股》作者。相信技術分析，由窩輪到牛熊證無一不炒，唔貪心，志在搵餐下午茶。
電郵：[email protected]；Weibo：#Gladyshan#
