話說我嘅戰友Jack終於都同佢太太去完日本旅行返嚟，佢幫我同另一個同事買咗個小玩意，電器白痴嘅我以為一拆盒就壞，開始灰到疊埋心水10月過日本時拎埋去換，誰不知無啦啦佢又識得叉電着燈喎，呢單嘢我家老爺完全目擊晒，佢話：貫切你嘅性格：無耐性。
Well，耐性呢啲嘢就睇吓對住啲咩先得嘅，好似噚日隻恒指熊(59842)咁，噚日計完數當以$0.064作為買入價，下晝見個市都無乜反應，日線圖上見恒指個勢仲有繼續向下嘅跡象，咁就梗係對(59842)有多少少耐性啦，揸過夜到今朝早，恒指開市報27619點，跌93點，都叫做有個小型裂口出現過；而開市後無幾耐就穿咗27600點，見到呢啲個樣作勢急跌嘅情況，都真係唔理啲分鐘圖住，直接跳去睇(59842)證價做緊乜好過，一睇就見佢最高做過0.076元，去到9點40分，即恒指仲見27600點樓下水平時，5分鐘圖見(59842)最高見0.074元。就用開市頭嗰10分(59842)嘅高低($0.076/$0.067)嘅平均數$0.0715作為賣出價，計落賺幅都有15.3%。
依家10點9分，恒指上演咗一幕瞬間補裂口之餘，依家仲見到5分鐘圖上一支大陽燭係咁隊一去，只係同步SlowSTC(14,3)已經頂無可頂，不過若然個市係都要搶返上去嘅話，最多都只會比SlowSTC(14,3)唞一唞，然後再上過。日線圖方面，雖然恒指個勢頂得好勁，不過都仲未上返去嗰五條平均線嘅是但一條；最正嘅係喺日線圖上出現咗一條比較闊嘅「下降通道」，又唔係話難搞嘅，即係個市未來有機會都喺呢條「下降通道」游走咁解啫，問題在於由通道嘅一邊去另一邊，行嘅過程唔會係純上(陽燭)或純落(陰燭)架嘛，即係可能睇啱咗方向，但因為中間嘅過程係可能會「崎嶇」少少，咁大家就要比多少少耐性，或者以輪代證，免得被人打靶。恒指Put(26085)，行使價27100點，2019年1月30日到期，屬中期輪，實際槓桿約10倍，低街貨、成交活躍亦係賣點之一。
作者阿珊，從事財經及投資版報道超過10年，由平面媒體走到網絡世界，《鐘擺戰略贏港股》作者。相信技術分析，由窩輪到牛熊證無一不炒，唔貪心，志在搵餐下午茶。
電郵：[email protected]；Weibo：#Gladyshan#
