|
熱門:

2018年8月29日 即巿股評 港股直擊

【盤房來料】港股結算前成交縮水表現牛皮

雖然隔晚美股仍向上,但升勢放緩,即使標指跟納指再創收市新高,三大指數僅錄得微量升幅。港股半日仍上升,但表現較為反覆,暫時喺50日線(約28320)上下爭持。恒指今早高開11點,一度曾跌79點,見半日低位28272點,其後回穩升134點,見半日高位28485點,不過50日線尚算穩守。半日恒指報收28415點,升64點;國指報收11084點,跌12點。半日成交縮水至只有413億元,睇嚟缸邊友喺期指結算及月結前,都唔想輕舉妄動。

港股經過星期一裂口上升兼大反彈,重上二萬八點之後,呢兩日喺50日線附近上落,似乎係要抖一抖氣,至於反彈受制28500點之後告一段落,抑或回一回氣再繼續,暫時阿Man唔係太肯定。不過影響大市嘅負面消息,之前已被市場消化得七七八八,而左右中港股市嘅關鍵人民幣,亦喺人行重啟逆周期因子後穩定落嚟,估計短線中港兩地股市傾向整固,暫時再出現急跌嘅可能性較低。

不過仲有個幾星期,即係9月6日又到美國向中國2000億美元進口貨品開徵新關稅嘅死線,之前中美雙方重啟貿易談判未見進展,屆時關稅嘅消息,可能又為中港股市帶嚟另一輪震盪。暫時可幸嘅係中國止住人民幣跌勢,總算向美國釋出善意,而美國財政部長已表示,中國出手撐人民幣,唔屬於貨幣操縱行為,至少中國可以避過被列入為貨幣操縱國,日後雙方就貿易問題再談判亦好講說話。

重磅股乏善可陳,友邦(01299)跟大笨象(00005)上升支撐大市,騰訊(00700)則見回吐,半日跌0.4%,報收363.8元,話咗騰訊見到365元,但375元好難見。至於長和系半日亦見資金追捧,超人將市值約133億元的長和及長實股份注入李嘉誠家族信託基金,長和(00001)升1.5%;長實集團(01113)升1.1%;長建(01038)升2.5%,電能(00006)亦錄得1%升幅。

中資金融股個別發展,內險股見上升,平保(02318)半日升0.3%。而新華保險(01336)中期盈利勁升79.15%,大行齊齊唱好兼上調目標價,刺激股價升2.6%。不過內銀股果然喺業績公布後有啲腳軟,建行(00939)跟中行(03988)分別跌0.4%及0.8%。不過農行(01288)跟工行(01398)則上升,跌幅較顯著係郵儲銀行(01658),半日跌3.6%。

話咗年初以嚟人民幣向下,令以人民幣收入為主嘅中資航空股業績受影響,南航(01055)派成績表半年賺少24%,股價半日跌4.3%,東航(00670)跟國航(00753)亦齊齊跌逾2%。好彩之前阿Man已呼籲過,捕捉呢個板塊反彈咪太樂觀,亦唔建議高追,皆因今年業績定必受人民幣貶值所拖累。同樣道理,內房股亦有呢個隱憂,即使今年內房股盈利維持增長,但人民幣貶值將影響下半年收入,內房股博反彈見好要收,阿Man中線唔睇好,大家仲有貨更應趁反彈減磅清倉。

麥狄文
(徐狄怡‧證監會持牌人)

回上

信報簡介 | 服務條款 | 私隱條款 | 免責聲明 | 廣告查詢 | 信報會議中心租賃 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。