熱門:

2018年6月27日 即巿股評 港股直擊

【盤房來料】熊市急插弱彈陰陰落

隔晚美股反彈,皆因「侵侵」表示將放寛限制中國投資美國美國科技企業嘅要求,並指將計劃通過國會,修改1988年的法律,以審批其他國家在美國投資會否引起國家安全問題。同時侵侵亦表示周日有媒體報道政府計劃兩項額外限制措施,以防止中國取得美國科技,係一個嚴重洩漏問題,有可能係有人老作。呢個消息令美國科支股回穩,加上油價反彈,美股回升,道指盤中曾彈逾百點,可惜收市升幅收窄至只有30點;而標指跟納指分別彈5點跟29點。跟之前跌幅相比,美股呢吓反彈,完全係小巫見大巫,毫無力度可言。

「侵侵」表面話放寬限制中國投資,但睇真啲,大家千祈唔好錯誤解讀「侵侵」嘅講話,其實真正嘅意思係,有關限制外國企業喺敏感技術領域對美投資,唔係針對中國一個國家,即係美國冇話會放過中國,而係一視同仁,一竹篙打晒一船人,所有外國企業投資美國科技企業都會受限制,目的係保護美國科技唔會被盜竊。所以美股尾段升幅縮水亦好正常,尤其係貿易戰陰霾未除,投資者傾向risk off,短期美股都係易跌難升,呢個六絕月睇嚟都係絕到底,好難走得甩。

至於港股噚日見過今年低位後反彈,盤中一度倒升,可惜尾市都係難逃一跌,即使隔晚ADR及夜期曾持續反彈,令今早恒指高開76點後,一度升107點,見過半日高位28989點,可惜內地股市未能止瀉,恒指反彈受制二萬九後再反覆回落。半日最多跌178點,低見28703點,中午挨住低位收市,報28713點,跌167點;國指則再跌111點,險守萬一關,報收11007點。

港股面對四正楚歌,恒指上周跌穿250日線(29333點)後再失守二月底位,幾乎可以確定港股已由牛步入熊市,尤其拆息高企,港元雖未有即時加息風險,但未來息口趨升已豪毫無疑問,對股市肯定唔係正面訊息。另一方面,內地股市弱不禁風,人民幣又每況愈下,更加令內地股市盡失吸引力,雖然阿爺叫停唔準融資融券相關股份斬倉,但仍未能止住內地股市跌勢。阿爺周日宣布嘅定向降準,亦並非為救市而實行,皆因向內銀放水,只為配合市場進行債轉股,同埋令銀行有水還番畀人行,即係塘水滾塘魚,無錢流入股市,內地股都係動彈不得。

港股自31500點開始碌落山,至噚日低位28500點,短短個幾星期已累跌3000點,但噚日略為彈一彈之後,今日又頽過,主要係牛證街貨死唔斷氣,雖然28800之上嘅牛證街貨已去無存菁,但噚日又見28200點至28500點嘅牛證街貨持續增加,大戶食髓知味,而港股亦弱勢已成,睇怕呢堆牛仔一樣小命不保。港股未來繼續係有波幅,冇升幅,至慘係有機會出現浪低於浪嘅走勢,阿Man最怕係港股唔再急跌,陰啲陰啲咁陰乾落去,急跌喺鐘擺效應下仍有反彈,但陰乾下跌就最呃人,尤其係嗰啲永遠以為股市係希望在明天嘅地方,今日唔肯打靶,明日又插深啲,一直泥足深陷。當大市已步入熊市,坐住蟹貨好應該審時度勢,壯士斷臂果斷止蝕,留住本錢待市況轉好再博殺,佛系坐盤去守一件蟹貨,只怕愈坐愈墮落。

麥狄文
(徐狄怡‧證監會持牌人)

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads