熱門:

2018年4月30日 即巿股評 港股直擊

【盤房來料】新股排隊上市 大市氣氛唔會差

今日上半場個市可以話悶到抽筋,指數係就係升超過400點,不過恒指早喺十點半前就上番30700水平之上,其後一直高位橫行,成幅圖好似無咗心跳一樣得一條打橫直線,簡直係悶到瞓著。國統局公布,中國4月份製造業採購經理指數(PMI)報51.4,預期51.3,前值51.5;繼續保持穩步增長,正因為PMI公布理想,大市即借勢挾高。

恒指高開逾200點,雖然曾見過30484點半日低位,但內地PMI做好,港股食住個勢再少上,恒指盤中曾高見30784點,半日報收30738點,升458點,順利收復所有移動平均線。國指則報收12314點,升247點,以中資金融股貢獻最大。睇番日線圖今日恒指成功衝破30400關並靠穩,即係移動區間非但唔會下移,甚至有可能日內升穿埋30800點關,向上移一級至30200至31200點,但暫時仍鎖於29800至31800呢2000點之內,直正突破仍要睇31800呢個大阻力位。今日內地股市假期,北水算上周四起已暫停,至本周三恢復買賣,又係趁北水暫停嚟挾淡倉,自去年10月國慶假期暫停北水交易,每次北水停賽,港股幾乎都挾番一千幾百點。

資管新規細則出台,但過渡期延長至2020年底,中資金融股全線做好,中國財險(002328)首季淨利潤按年增加約17%,刺激股份急升4.49%,其他內險股均見做好,中國人壽(02628)更咸魚翻生,半日升近4.5%,其他內險股全做好。內銀股表現同樣出色,招商銀行(03968)勁飆5.5%;郵儲銀行(01658)升4%,四大行中以農業銀行(01288)升3.5%最標青,其餘3行升1.9%至2.8%。今日擺到明係金融股做火車頭,息口趨升有利銀行股,今日友邦(01299)升1.8%重上70元;大笨象(00005)跟渣打(02888)雙雙升近2%。預期近排都係金融股跑贏,始終加息利好呢個板塊。

至於騰訊(00700)股王已失光環,今日雖有反彈,但一如阿Man上周所講,405元大股東減持批股價,由昔日嘅支持變做阻力,半場反彈最高393.6元,400元連影都見唔倒。雖然科技股跟手機設備股今日都隨大市反彈,但係中興(00763)跟華為事件未知點收科,短期呢個板塊只有波幅,唔會有升幅,反彈力水亦只係一般,唔多建議入場接飛刀。

今日同股不同權新股開始接受上市申請,暫未知反應有幾熱烈,但對港交所(00388)一定有利,股價半日升2%,報收257.6元,睇嚟有機會反覆向上試265元較大反彈阻力位。陸續有新股上市,預期大市氣氛唔會太差,即管睇睇大市有冇本事向住移動區間頂部推進,既然新股陸續有嚟,不如睇吓今日開始招股嘅捷榮國際(02119)諗唔諗得過。捷榮招股價為1.5元至2.19元,入場費約4424.14元,星期五(5月4日)截飛,11日下星期五掛牌。

捷榮適合收息一族

同其他新股一樣,捷榮今次上市同樣引入基石投資者,包括日本食品商 NH Foods及新加坡食品商Fraser and Neave ,公司強調並非為集資而集資,集團董事會主席及行政總裁黃達堂強調,上市後自己仍持股約6成,即係暗示呢隻股股權仍算集中。集團喺香港嘅咖啡及奶茶市場可以話係龍頭供應商,香港目前約六成食店均能接觸,茶餐廳及咖啡店市場覆蓋率更達七成。以B2B收入計,捷榮喺2016年係香港最大的B2B咖啡及紅茶策劃服務供應商,市場份額達24.5%。為咗業務發展多元化,捷榮喺2013年開始喺香港及中國進行急凍肉類產品業務,並擴展產品組合。除咗加強採購能力及優化甄選供應商過程,亦積極提升生產設施,進一步增加產能。集團承諾派息不少於純利35%,從歷史數據反映,新加坡上市時派息比率高達50%至60%。集團業務以內需及民生為主,受經濟周期影響低,防守性高。新股當然抽得過,不過上市後超額認購倍數太高,股價升幅過大的話,抽到當然有糊要識食。不過集團未來進一步發展內地及東南亞市場,市場增長潛力高,適合長期投資的收息一族。

麥狄文
(徐狄怡‧證監會持牌人)

回上

信報簡介 | 服務條款 | 私隱條款 | 免責聲明 | 廣告查詢 | 信報會議中心租賃 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。