今日趕到甩轆,雖然周末前夕,通常被假日情懷影響,會令人懶散,偏偏阿Man今日忙到飛起,所以今日《盤房來料》都晏咗出街。講番隔晚美股上上落落,最終三大指數均報升收市,港股受帶動今早高開203點,成功收復10日線(約30740),一度升至半日最高30978,不過三萬一水平遇阻力,而尚欠50日線(約31218)未收復,未能確認爆咗條邊出嚟。中午恒指報收30914點,升260點;國指報收12405點,升70點。
噚日阿Man已表示大市似要突破向上,主要係三萬點似乎打得幾實,結果昨午跟今早港股確見做好,只係無論噚日抑或今早半日成交略嫌不足,睇嚟缸邊友自二月回調,港股跟足美股經常大玩過山車開始,被玩到頭暈眼花,加上花旗近來又七國咁亂,唔少缸邊友寧願避一避,一係唔入場,又或者有貨在手按兵不動,令成交縮水。加上兩會期間,北水亦唔敢輕舉妄動,即使近三個交易日已回復淨流入,但「港股通」動用額度有限,又係買賣兩閒。
重磅股普遍跟大市回升,以為油價冧到咁款,三桶油會插水,但又唔見太大沽壓,輕微下跌或靠穩,其他重磅股當然無乜問題。不過四大天王升幅有限,內銀股雖受惠中銀監降撥備紅線,股價昨日急升後無以為繼,未見再給力,阻力大市升幅。反而吉利汽車(00175)似完成調整,上半場升4.3%,地鐵(00066)派完成績表亦有唔錯表現,兩股半日均升逾4%。
醫藥股又再尋頂,講咗N咁多次,呢個板塊逢回吐吸納無乜點錯,龍頭石藥(01093)跟中生製藥(01177)都係阿Man愛股,半日兩股分別升3.4%及2.4%,前者更見19.4元新高。至於調整咗一段時間嘅康哲藥業(00867),昨日大成交配合下走勢突破,半日再升3.7%。其他藥業股普遍做好,只有石四藥(02005)創新高後有回吐。
至於另一強勢板塊教育股今日有回吐,識貨之人當然又會把握機會低吸,呢期留意中教(00839)跟新高教(02001)兩港股通新貴,後者今早曾跌一成,不過喺10日線樓下又見買盤吸納,不妨睇多陣,只要股價穩守5.7元樓上,回調可能就係撈貨好機會。
雖然大市已成功收復兩條移動平線,但50日線阻力唔細,加上之前回補大型下跌裂口31600-31800後即急回,暫時港股走勢仍然反覆,每一個消息均影響市場情緒,好淡之間喺30000至31000呢一千點之間角力,除非大市能成功企穩31200點,並進一步向上突破31800水平,否則升勢難以全面回復,集中喺強勢板塊尋寶,勿太介懷指數短線波動。
麥狄文
(徐狄怡‧證監會持牌人)