港股近日表現反覆,當然近日走勢一浪低於一浪,係反覆偏軟兼弱過藥煲,唔少缸邊友及專家,開始改變睇法,好友變淡友。不過直到目前呢一刻,阿Man對後市仍然睇好,雖然刻下技術走勢相當惡劣,美股閃崩後亦未回穩,美債息仍然高企,A股更不斷向下尋底,眾眾因素都影響住投資者嘅情緒,令到呢幾日嘅沽壓沉重。
美股隔晚先升後回,納指表現最差,不過早段升勢則帶動港股喺夜期同ADR時段威過一陣,可惜隨住美股回落,港股今日表現繼續反覆。恒指今早高開232點,一度最多升415點,見30739點半日高,重上50天線(約30612點),其後又再回落,曾倒跌71點,見30251點,創1月2日以來新低。恒指中午收報30342點,升19點或0.1%;A股疲弱令國企指數跑輸,中午收報12343點,跌89點或0.7%。
港股同你日日大玩過山車,過千點波幅開始趕客,加上愈嚟愈多人相信大市已見頂,又臨近過年,唔少缸邊友寧願喺現水平先沽貨套現,一來為保本,二來怕個市再失三萬大關會無命。
不過阿Man又唔係睇得咁灰,只要美股喘定,A股止跌,港股未必咁快死得去。皆因今年仲有大把IPO排住隊嚟港股上市,包括有史以嚟最大型嘅集資IPO沙地阿美,仲有大堆趁同股不同權放寬後,要嚟港股登陸嘅新經濟股,若然港股就此玩完,呢一大堆新股真係搵鬼要。
但技術走勢方面,港股確係好差,50日線失守,今日反彈亦似乎受制此關,要扭轉目前弱勢,需要盡快收復50日線。唔好忘記圖係死嘅,人係生嘅,而圖表亦經常充斥陷阱,只要自己計好數,入市前製定策略,那怕佢狂牛地震,亦能處之泰然。
雅生活明日上市可留意
講開IPO,喺市況反覆情況下,新股仍有一定捧場客,由雅居樂地產(03383)分拆出來嘅雅生活服務(03319),已完成招股,據悉其國際配售反應熱烈,市傳公開發售更超額20倍,明日首日上市,定價為12.3元,料為股價預留上升空間,可看高一線。
由於雅生活服務還有戰略股東綠地控股,在雙品牌戰略下,成功打造為商用及住宅物業管理標杆品牌及覆蓋物業管理全產業鏈的綜合服務平台,從而進一步提高其競爭力。
截至去年9月底,雅生活在中國65個城市提供物業管理服務,在管總建築面積約為76.2百萬方米,服務業主及住戶逾100萬。近年來,公司加快戰略布局及加快擴展速度,上月並與支付寶訂立3年期的合作框架協議,於在線支付、資金結算、智能社區及營銷等方面建立合作,進一步增強公司品牌知名度及業務規模。
麥狄文
(徐狄怡‧證監會持牌人)