噚日見到恒指失重心先跌20天線之後,下半場跌幅大為收窄,最後收市都只係跌300零點,恒指5分鐘圖SlowSTC(14,3)幾乎全日都處於超買水平,變相噚日全日幾乎都係恒指Put(21216)落場嘅時間;係就係收市見跌少咁多有啲驚,但總驚唔過8點未到就被人打電話嘈醒,然後係電話嘅另一段大叫:「美股跌過千點呀!」Well,天寒地凍,放過我啦!
今朝港股咩境況唔使講啦,相信大家都應該收到來自唔同app send出嚟嘅notification;返到公司打緊呢隻稿嘅時候,恒指不停地跌,依家10點6分,恒指報30971點,跌1274點,坦白講都真係好耐未見過千點嘅數;跟手我搵返自己噚日寫個條稿「恒指發『霜凍警告』」先發現,原來有內地media「幫手」將個內容先由繁轉簡,再一粒字都唔刪、原汁原味咁post係佢哋個website度(簡體咗嘅廣東話版本真係會睇得明架?學我大老細話齋:我唔知喎!)
個市咁嘅樣,除咗放走噚日隻(21216)之外真係無咩好做,開恒指牛熊證街貨圖睇,用返幾分鐘前mark低個口價計數,望望日線圖最低最過30858點。雖知道輪商網站嘅恒指牛熊證街貨圖只係會列出恒指牛熊證1000點差距內嘅街貨量(即係10個100點範圍),換言之牛證嚟講就只得返最低個行嘅30800至30899點,呢度就係依家最貼價嘅街貨,有相當於568張期指,大戶今朝一食就食咗3293張期指。上方熊證最貼價嘅就係32700至32799點,呢度有相當於167張期指,同現價比嘅話,首先要個市反彈1828點,咁就可以食到呢個熊證第一貼價區啦(比你都唔會咁做啦)。
日線圖上,恒指其實今朝個大裂口下行,一挫就挫到落去保歷加通道底(30978點),低位計仲穿埋添;保歷加通道雖然未有拓寬嘅跡象,不過此前嘅上升幅好明顯咁開始轉入橫行(甚至之後可能下行),若然再落就要數50天線(30598點)。至於技術指標方面,14RSI現報40.52,未算係超賣範圍;MACD裡見「熊差距」同DIV係負數,仲有最終極嘅「雙熊」係未出現架;至於感敏度較高嘅SlowSTC(14,3)%K線當然跌穿%D線啦,唯兩數分別報31.53同48.83,都係未正式進入超賣範圍,最後DMI嘅+DI當然低走於-DI,但兩線只係喺噚日出現相交,即係話呢個交叉未算最大。
噚日隻(21216)擺明由價外變價內架啦,今日揀隻恒指Put(21530),行使價30448點,係低過條50天線架,唔好睇佢換股比率成 11000,其實佢暗藏高槓桿、低引伸,筍盤嚟架!小注為妙,事關跌到咁,再跌落去應該唔會又千千聲;若然屈返少少上去,咁你都無咁傷。
作者阿珊,從事財經及投資版報道超過10年,由平面媒體走到網絡世界。相信技術分析,由窩輪到牛熊證無一不炒,唔貪心,志在搵餐下午茶。