隔晚美股科技股獨強，道指微調，但標指跟納指再升，以為隔晚ADR咁強勁上咗三萬三，港股今日又嚟料，當全世界都抱住同樣預期，咁多數都係天氣不似預期。港股今日確係再創新高32981點，但跟三萬三仍有啲距離，半日都係報跌收市。
恒指低開23點，曾倒升最多50點，見32981點再創新高，不過未能一舉衝破三萬三點掉頭回落倒跌，盤中最多跌202點，見32728點，其後收復部份失地，跌幅收窄。恒指中午收報32837點，跌92點或0.28%；國企指數報13497點，升7點。
四大股王終於今日齊齊過堂，而呢兩日強勢嘅內銀股亦見回吐，騰訊(00700)暫跌1%，半日報收470元，升咗咁多回一回都好正常。至於差一步見紅底嘅平保(02318)，噚日已經以陰燭收市，今日跌係意料之內，半日跌2.2%，唔知午後能否收窄跌幅。港交所(00388)亦跌失1%，暫時險守300元，不過今年大牛市，兼且成交keep住有增無減，港交所回深啲就係撈貨好機會。而大笨象(00005)近幾日已唔多識郁，不過今日又唔算回得多，股價半日跌近0.3%，報收85.45元。奇怪係每晚ADR時段，大笨象都企穩86元之上，而喺ADR交易嘅，當然係機構投資者，仲要係外資，既然有大孖沙肯晚晚畀多成蚊買貨，後市仍可睇高一線。
油價持續上升，紐約期油更創下超過3年新高，油價帶動下，三桶油全線向上，中石油(00857)跟中石化(00386)升逾3%，反而阿Man較睇好嘅中海油(00833)僅升1.8%。不過三桶油升幅遠遠不及油服股，中海油服(02883)發盈喜，去年可扭虧為，半日升近6%，其他油服股閒閒地升一成或以上，整個板塊起動，擺明係強勢股抖氣，資金轉追落後。
至於阿Man今年睇好嘅醫藥股個別發展，升得多嘅龍頭普遍回吐，但中國中藥(00570)跟潤藥(01515)等逆市上升。至於中證監唔批准康寧醫院(02120)回歸A股上市，股價急挫近兩成，其後跌幅收窄至11%。阿Man建議不妨留意遠大醫藥(00512)，此股晒士近百億，相當合北水脾胃，一旦獲納入港股通，股價可以升到你唔信。
港股今日回調，未知今早32981呢個係咪短期頂部，話晒升越2007年高位31958後，已再升千點，大市開始調整唔出奇。不過呢幾日期指開始轉倉，預期較大幅度嘅調整唔好咁快出現，至少呢個月能否再挑戰三萬三點唔敢講，反正大部份指數權重股已進入無阻力區，一旦資金再湧入掃貨，港股再下一城有幾出奇。目前大市都係以大漲小回姿態運行，覺得累計升幅大想減磅唔反對，至於要做淡友，並大叫牛轉熊市股災在即，喺目前未有重要利淡消息，兼且唔見轉勢嘅時候講呢啲，真係人唔笑，狗都吠。
麥狄文
(徐狄怡‧證監會持牌人)
