港股噚日十二連升，今日似乎要斷纜，隔晚美股稍作回吐，港股夜期都跟住軟一軟，不過ADR有大笨象(00005)撐住仲有得升，可惜最重磅嘅股王騰訊(00700)噚日已有啲「騰」，未能上破周二高位446.6元再下一城即掉頭，短期遇阻力要回頭，大市升勢亦被阻。
恒指略為低開7點後，曾拗腰倒升59點，見31133點半日高位，再度掉頭回落，半日最多跌123點，低見30950點。恒指中午收報31010點，跌63點；國企指數報12248點，跌40點。
大市暫時喺三萬一水平爭持，連升十二個交易日之後，抖抖回氣好正常，而阿Man噚日已講過，大市要繼續向上，幾隻重磅股要同時發力，否則大市隨時停步甚至調整。騰訊升得快亦回得急，今早裂口低開436元跌勢持續，最低見430元，半日報收430.6元，跌9.8元或2.2%，短期有機會下試10日線(427.2)尋找支持。除咗騰訊要回氣，港交所(00388)亦見回吐，早段最低見265.6元，其後跌幅收窄，半日報收268.8元，但噚日個高位暫時鎖死咗，即使唔回深啲，短期都要整固一下。
內銀股確係剛起步，無奈又被祝福，但凡被某某祝福過嘅股份，就算幾強都好，經佢金口一開，點都會軟一軟，那怕只係一日半日短暫回吐。不過阿Man對內銀股今年表現仍有信心，有貨可以繼續坐定定。要數今日最搶眼當然係大笨象，昨日北水大量流入，ADR升勢持續，今日又點可以畀佢停，半日升近2%，創超過3年新高。留意係大笨象裂口高開，遺下大大個上升裂口之餘，現價低過83.95元開市價，今日收市保持陰燭走勢，隨時步騰訊後塵要回吐。口痕友話大笨象係新一代藍燈籠，重磅股升到佢，大市點都要回一回，不過恒指累計升逾千八點，回調整固回番三五百點好正常，今日暫時喺三萬一爭持，三萬一失守先見30800。
汽車股食咗瀉藥，剛剛發盈喜嘅吉利(00175)連跌幾日，仲要失守50日線，走勢唔多穩陣。龍頭做唔好，其他汽車股齊齊過堂，整個板塊下跌，只有近其獲資金追捧嘅北汽(01958)再創兩年半新高，半日升近1.8%。
內需股今日炒到服飾股，之前推介過嘅安踏體育(02020)創新高，半日升逾2%，其他服飾股普遍上升，不過阿Man興趣不大。早兩日落鑊嘅水泥股，阿Man無乜點提過，就係知道所有資源股都難炒，今日仲要有數據顯示水泥價格有所回落，大部份水泥股高台跳水，閒閒哋跌三五七個巴仙。
大市連升多日，要健康發展點都要調一調，目前策略都係吼住強勢板塊回調時吸納，指數先睇回調去30500至30800點，未宜大槓杆操作。只要制定好持倉策略，無懼短線波動，除非大市失守30500點，否則暫時無減倉需要。
麥狄文
(徐狄怡‧證監會持牌人)
