港股打風昨日只得下晝有市，但突然科網股齊抽升，最初大家只以為阿爺重提撐民企科網，阿里巴巴(09988)與京東(09618)盤中齊飆逾一成，明顯解釋難服眾，隔晚突然有條Breaking News講中美傳就中概股審計問題接近達成協議，大家終於明白發生乜事，原來喺有春江鴨郁手做嘢。
勿對中美審計傳聞太大期望
牌面睇，筆者認為可信性唔高，首先昨日成交九百億，但北水竟然錄淨走，其次今早個別中概先升後跌，當中以貝殼(02423)最誇張，曾飆一成四後中午收市倒跌；還有拉埋美國參議員訪台及中美就航班爭拗新聞睇，明顯兩國分歧好大，還未計查數其實有勁多技術細節，單單只喺運送途中唔見咗D資料邊個孭飛，都已經相當頭痕。
正如某位前地產分析員話齋，好神奇地每逢月尾唔知點解外媒總有消息，但上述最終都終Fake News，唔通喺有人在月尾期指結算做嘢乎？
在過去一年半港股漫長的熊市中，好難得昨日出現勁升近七百點，好友又再次高呼「牛市在熊市中誕生」，但明顯地投資者在熊市中要求又再次下降，因為上升只是俱俱七百點，已觸動好友的神經。
再者，更有分析認為目前恒指歷史PB及PE超低，以PB計，不單低過一，更是掟至0.8倍樓下，市盈率也不足7.5倍，簡直是平到有今生無來世。
首先，大家要明白恒指歷史PB在目前市況意義不大，單單是內房Book Value都蒸發咗唔少，至於歷史PE更加不可信，因為藍籌數目過去一年大幅增加，按某外某平台計算恒指每股盈利是2623.47元，但按恒指服務公司資料計算上月底市盈率11.14倍計，轉化成每股盈利其實只喺1809.38元，因此恒指不是外媒所講的不足8倍，而是11.1倍(以昨日收市價計)。
比個概念給大家，恒指由1973年至今歷史市盈率平均為14.8倍(資料從恒指服務公司)，負一標準差為10倍，經濟差時期可壓到去八倍樓下經常存在，最慘時期更壓到去1982年的5.6倍。
歐洲第四季或現灰犀牛
筆者想重申一點，熊市仍未結束，今次觸發點大有機會在歐洲，單單是電價狂飆，將會令歐洲製造業以至家庭開支相當頭痕。最新是英國能源監管機構今午表示，英國能源價格10月上限會大增八成至3549英鎊，並預計明年1月能源價格會再升。
按去年GDP數據，第一及第二大經濟體分別為美國和中國，分別為22.94和16.86萬億美元，德國+英國+意大利+法國+西班牙+荷蘭+奧地利+瑞士及北歐三國，GDP合共約近18萬億美元，而家歐洲後園失火，第四季才是戲肉所在，究竟是「牛市在熊市中誕生」，定喺「牛友被熊市中嚇親」，我相信後者居多。
編按:作者尹德政(Ricky)，醉心投資美股近十載，最大滿足感來自尋找抵買有實力的世界行業領袖，每逢周三、五在「信報網站」及「港股360」撰文。
