隔晚美股大跌,道指插569點(1.6%),債息抽至1.5厘樓上,令納指更瀉2.8%,喺咪真喺要驚10月股災?
唔講大市點睇前,先問大家一條數學題,目前聯儲局依然每個月買1200億美元債,若果聯儲局真喺12月開始啟動縮減買債,到明年7月完成退市,請問聯儲局到7月退市果陣,仍會投放最少幾多錢入市場?答案喺6600億美元(圖一)。
目前聯儲局資產規模為8.5萬億美元,按照聯儲局呢個部署,明年7月資產規模會升至9.2萬億美元,即比今日再升8.2%,呢條數仲要未計拜登3.5萬億美元基建方案。
美股好難暴跌
假設拜登基建方案打八折,最終出台只是2.8萬億美元,連同6600億美元聯儲局買債,總數是約3.46萬億美元,即現時聯儲局資產負債表逾四成,都咪話唔誇張,所以大市其實好難暴跌。
近期10年債息抽升至1.5厘樓上,末日派股民又齊齊大力宣傳會有股災,喺咪真喺咁驚先。筆者當然唔認同,首先債息上升,對美國現時孭住28.4萬億美元債務,無疑是會雪上加霜,若果長債息硬要上升,聯儲局唔喺無計,就例如可以甪Yield Curve Control(YCC)方式壓低長債,之後再搬龍門,延長買債時間等等。
再者,債息上升,因市場預期通脹升温,通脹預期升温因為大家望到油價心驚,但油價要升到一百美元樓上相當困難。一來美國頁岩油商會泵多D油散貨,其次光伏及風電已比化石能源成本低(可重温周一搶攻美股節目分析),加上各地政府可以開倉壓價,要重現油價飛升談何容易。
港股短期氣氛或好轉
更何況,目前十年期實質利率依然喺負(圖二),在聯儲局目前極到唔想加息下,要重演2013年實質利率由負轉正,也是相當困難,故此美股好難大跌,金價也是一樣。
至於港股,短期方面,自從華為大小姐從加拿大回來後,中美關係有可能好轉,最近更有消息傳中美協商重開成都和候斯頓總領館,正所謂空穴來風未必無因,若果成事,會對港股有提振作用,特別是中芯(00981)。
雖然短期轉軚睇好後市,但最近航運股無厘頭急跌,暫時未知原因,但保命要緊要止蝕,至於近期升咗好多的新能源股,似乎近第三季尾,不單是Crowded Trades,更加是大家坐住好多利潤,喺時候落車換馬,換馬去因近期跌到勁多的科網及汽車股,可能喺唔錯嘅選擇。
作者尹德政(Ricky),醉心投資美股近十載,最大滿足感來自尋找抵買有實力的世界行業領袖,每逢周三、五在「信報網站」及「港股360」撰文,另每逢周二在《信報》撰寫「美股歷奇」。
(編者按:信報分析團隊羅崇博、尹德政、陳鎮強最新著作《勢在必行:活用全方位價值趨勢信號》現已發售)
歡迎訂購實體書 電子書:https://bit.ly/ejbook141