熱門:

2018年5月4日 即巿股評 港股直擊

【盤房來料】大笨象季績強差人意

曾經有唔少人問我,點解喺各個平台發表嘅專欄,九成九都係以口語化寫作,我可以好清楚肯定咁答大家,因為我母語係廣東話,我自細學寫嘅係正體字,喺香港地大部份人一直以廣東話溝通,要最直接表達我嘅想法,最理想當然係用廣東話…..完。

講番隔晚美股又坐過山車,早段市場擔心美方貿易談判代表出訪中國無功而回,道指一度插水近400點,最終收市倒升5點,可惜仍未能收復二萬四大關,至於標指跟納指跌幅收窄。美股能夠拗腰,全靠白宮經濟顧問派定心丸,指雙方談判進度理想,目前只等中方回應配合。留意番……係要中方配合,阿爺肯唔肯就範係一件事,千祈咪太一廂情願。估計呢兩日美股都會受談判消息影響,不過有著名策略師就話美股低位大反彈,主要係因為價錢太平,吸引資金入場掃貨。

講到平,港股現價PE仲平過美股多多聲,不過阿Man唔係著名策略師,當然無缸邊友會聽我呢枝笛。睇番港股呢邊,感覺上係搖搖欲墜,恒指今早高開3點,報30316點,係咁矣見一見30341半日高位後反覆回落,一度跌327點,見29985點半日低位,其後跌幅收窄,三萬大關失而復得,恒指中午報30208點,跌104點;國企指數報11984點,跌34點。恒指繼續喺29800點至31000點之間上落,直至今日亦未走出呢個框框。

騰訊空軍似乎開始收手

重磅股四大天王只有騰訊(00700)逆市上升,皆因空軍似乎開始收手,呢兩日騰訊累積沽空金額有回落跡象。相反平保(02318)累積沽空金額有增無減,截至噚日累計沽空金額已達1130億,可見空軍大戶對平保睇法要幾淡有幾淡。又好難空軍對平保開火重擊,今日阿仔平安好醫生(01833)首日登陸魚缸,股價最高58.7元,半日報收55.55元,抽中一手高位出貨都叫有杯咖啡飲吓,以上半場收市價計,手續費都蝕埋畀佢,唔怪得有缸邊友即幫好醫生改名,叫做平安西醫,以咁大晒士嘅新股同埋近日上市主板股比較,好醫生表現又真係西咗啲。未能母憑子貴,平保半日跌0.7%,險守75元,報收75.1元,下個支持位喺250線,即係69.3元。

回購規模遜預期

另一市場焦點當然係大笨象(00005)公布季度業績,結果係表現強差人意,季列賬基準稅前盈利跌4%,短期內展開最多20億美元回購。大笨象雖然卒之公布回購計劃,但晒士得嗰20億美元,兼且講到明係年內唯一一次回購,股價表現當然唔會好得去邊。加上未能守住78元,又要睇番75元呢個位守唔守得住。

幾隻重磅股表現麻麻,目前係最弱勢嘅騰訊叫做定番啲,但另外三頭馬車又死死地火,恒指能夠守住30000大關已經要收貨。即管睇吓中美貿易談判發展如何,將會直接左右中、港、美三地股市表現。

麥狄文
(徐狄怡‧證監會持牌人)

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads